కరోనా వ్యాప్తి నివారణ చర్యల్లో భాగంగా ప్రభుత్వ ఉద్యోగులకు వారానికో బృందం చొప్పున వంతులవారీ పని విధానాన్ని ఏప్రిల్ 4 వరకూ అమలు చేయాలని రాష్ట్ర ప్రభుత్వం నిర్ణయించింది. అన్ని శాఖల ఉద్యోగులతోపాటు ప్రభుత్వ రంగ సంస్థలు, సొసైటీలు, స్వతంత్ర సంస్థలకు ఈ విధానం వర్తిస్తుందని శనివారం రాత్రి జారీ చేసిన ఉత్తర్వుల్లో వివరించింది. అత్యవసర సేవల్లో పనిచేసే ఉద్యోగులకు ఈ విధానం వర్తించబోదని స్పష్టం చేసింది.
* పదవీవిరమణ పొంది 60 ఏళ్ల పైబడి సలహాదారులు, ఛైర్‌పర్సన్‌ బాధ్యతల్లో ఉన్నవారికి శాఖాధిపతుల అనుమతితో ఇంటి నుంచే పనిచేసే వెసులుబాటు కల్పించింది.
* ఇంటి నుంచే పనిచేసేందుకు అనుమతి తీసుకున్నవారు ఇ- ఆఫీస్‌ ద్వారా విధులు నిర్వర్తించాల్సి ఉంటుంది.
* 50 ఏళ్లు దాటి స్వీయ నిర్భంధంలో ఉన్నవారు, అనారోగ్యంతో బాధపడుతున్నవారు, శ్వాస సంబంధిత ఇబ్బందులున్న వారు వైద్యుల ధ్రువీకరణ లేకుండానే ఏప్రిల్ 4 వరకూ సెలవులు తీసుకోవచ్చు.