రాష్ట్రంలోని శ్రీకాకుళం, విశాఖపట్నం, గుంటూరు, నెల్లూరు, ప్రకాశం జిల్లాల్లోనూ సాంఘిక సంక్షేమ గురుకులాలకు సరకులు పంపిణీ చేయబోమని గుత్తేదారులు తేల్చిచెప్పారు. జిల్లా అధికారులు వారికి సర్దిచెబుతూ నెట్టుకొస్తున్నారు. ఇతర జిల్లాల్లోనూ పరిస్థితి తీవ్రంగానే ఉంది. సరకులను సక్రమంగా సరఫరా చేయనందుకు జిల్లా అధికారులు మెమోలు జారీ చేసినా ఫలితం ఉండడం లేదు. రూ.కోట్ల బిల్లులు పెండింగ్‌లో ఉంటే సరకులు ఎలా సరఫరా చేస్తామని ప్రశ్నిస్తున్నారు.
బిల్లుల అప్‌లోడింగ్‌లో జాప్యం..
సరకుల సరఫరా నిలిచిపోయి విద్యార్థులు అవస్థలు పడడానికి గురుకులాల అధికారుల నిర్లక్ష్యమే కారణం. అన్ని జిల్లాల గుత్తేదారులకు సంబంధించిన రూ.27 కోట్ల బిల్లుల్ని ఇంతవరకూ సీఎంఎఫ్‌ఎస్‌కు పంపలేదని సమాచారం. కాంట్రాక్టర్లు సరఫరా చేసిన సరకుల బిల్లులను ప్రిన్సిపాళ్లు జిల్లా అధికారులకు పంపించాక... అక్కడి నుంచి తాడేపల్లిలోని సాంఘిక సంక్షేమ గురుకులాల సొసైటీ కార్యాలయానికి వస్తాయి. అక్కడ అధికారులు పరిశీలించి సీఎంఎఫ్‌ఎస్‌కు పంపాల్సి ఉంటుంది. గత నాలుగు నెలలుగా ఈ ప్రక్రియ జరగలేదని తెలిసింది. బిల్లుల చెల్లింపు నిలిచిపోతే సరకుల సరఫరాపై ప్రభావం పడుతుందని తెలిసినా అధికారులు మిన్నకున్నారు.
ప్రశ్నార్థకమైన మెనూ అమలు..
సరకుల సరఫరా జరగక కొన్నిచోట్ల ప్రధానోపాధ్యాయులే సొంతంగా జేబు నుంచి ఖర్చు చేస్తున్నారు. ఆర్థిక భారం మోయలేక...మెనూలో కోత విధిస్తున్నారు. విద్యార్థులకిచ్చే పళ్లు, అల్పాహారంలో కోత విధిస్తున్నారు. సాయంత్రం వేళ రాగిజావ వంటివి ఇవ్వడం లేదు. తమ జేబు నుంచి చేసిన ఖర్చులకూ చెల్లింపులు సరిగా లేవని పలువురు ప్రధానోపాధ్యాయులు వాపోయారు.