విద్యార్థుల్లో నైపుణ్యాల పెంపు, ఉద్యోగావకాశాల కల్పనకు అనుగుణంగా కొత్త పాఠ్యాంశాల(సిలబస్‌)ను ఉన్నత విద్యామండలి రూపొందించింది. ఈ విద్యా సంవత్సరం నుంచే ప్రవేశపెట్టనున్న పాఠ్యాంశాలను మంత్రి సురేష్‌ సోమవారం ఆవిష్కరించారు. తరగతి గది బోధనతోపాటు విద్యార్థులకు ప్రాక్టికల్‌ అనుభవం వచ్చేలా సిలబస్‌ను తీర్చిదిద్దారు. యూజీసీ సూచనలకు అనుగుణంగా డిగ్రీలో ఛాయిస్‌ బేస్డ్‌ క్రెడిట్‌ విధానాన్ని(సీబీసీఎస్‌) 2015-16లో ప్రవేశ పెట్టారు. మొదట్లో సీబీసీఎస్‌ పాఠ్యాంశాలున్నా క్రెడిట్‌ మార్పు అవకాశం విద్యార్థులకు కల్పించలేదు. తాజా సిలబస్‌లో ఈ మార్పు తీసుకొచ్చారు.
- ఈ విద్యా సంవత్సరం నుంచి మొదటిసారిగా ఫలితాల ఆధారిత పాఠ్యాంశాలను తీసుకొచ్చారు.
- ఫౌండేషన్‌ కోర్సుల స్థానంలో జీవన నైపుణ్య కోర్సులను ప్రవేశపెట్టారు. సెమిస్టర్‌కు ఒక కోర్సు చొప్పున 3సెమిస్టర్‌లకు మూడింటిని విద్యార్థులు ఎంపిక చేసుకోవాలి. నాల్గో సెమిస్టర్‌లో పర్యావరణ విద్య ఉంటుంది.
- నైపుణ్యాభివృద్ధి కోర్సుల్లో మూడు సెమిస్టర్లలో నాలుగు కోర్సులను చదవాల్సి ఉంటుంది. రెండో సెమిస్టర్‌లో రెండు కోర్సులను తీసుకోవాలి.
- చివరి ఏడాది ఐదో సెమిస్టర్‌లో నైపుణ్యాల పెంపుపై ఆరు కోర్సులు ఉంటాయి.
- విద్యార్థులందరికీ 10నెలలు తప్పనిసరి అప్రెంటిస్‌షిప్‌, ఇంటర్న్‌షిప్‌, ఉద్యోగ శిక్షణ ఉంటుంది. ఇది మొదటి, రెండు ఏడాదుల్లో వేసవి సెలవుల్లో రెండు నెలలు చొప్పున ఉంటుంది.
- విద్యార్థులు, కళాశాలలను సమాజంతో అనుసంధానం చేసేందుకు కమ్యూనిటీ సేవల ప్రాజెక్టును ఇంటర్న్‌షిప్‌లో భాగం చేశారు. మొదటి ఏడాది పూర్తయిన వెంటనే ఇది ఉంటుంది.
- ఆన్‌లైన్‌ కోర్సులు చేసేవారికి, ఎన్‌సీసీ, ఎన్‌ఎస్‌ఎస్‌, ఎన్‌జీసీలో పాల్గొనే వారికి అదనంగా క్రెడిట్స్‌ ఉంటాయి.