మరోసారి వైకాపా ఎంపీ రఘురామకృష్ణ రాజు సొంత పార్టీ నేతలపై విరుచుకుపడ్డారు. పందులే గుంపులుగా వస్తాయి..సింహం సింగిల్గా వస్తుందంటూ ఘూటుగా స్పందించారు. తనను విమర్శించిన వాళ్లు జగన్ బొమ్మ పెట్టుకుని గెలిచి చూపించాలని సవాల్ విసిరారు. జగన్ ఇంటికి వెళ్లనని ఎన్నికల ముందే చెప్పానని అన్నారు. ఈ విషయంలో తనకి ఇష్టంలేదని తెలిసి ఎయిర్‌పోర్టులో వాళ్లే వచ్చి కలిశారని స్పష్టం చేశారు.
'నన్ను విమర్శించిన వాళ్లు రాజీనామా చేస్తే నేనూ చేస్తాను. మా పార్టీ ఎమ్మెల్యేలు, మంత్రులతో నాపై తిట్ల పర్వం కొనసాగించారు. ఎమ్మెల్యే కొట్టు సత్యనారాయణ ఇసుక బ్రోకర్. ఇళ్ల స్థలాల్లోనూ ఆయన దండుకున్నారు. కొట్టు సత్యనారాయణ అరాచకాలు ఆయన మేనల్లుడే చెబుతారు. ఎమ్మెల్యే నాగేశ్వరరావుపై అనేక అవినీతి ఆరోపణలు ఉన్నాయి. ఎమ్మెల్యే గ్రంథి శ్రీనివాసరావు కూడా సీఎం అపాయింట్‌మెంట్‌ దొరక్క బాధపడ్డారు' - రఘురామకృష్ణరాజు, నరసాపురం ఎంపీ