పదో తరగతి పరీక్షల నిర్వహణపై మాట్లాడుతున్న మంత్రి ఆదిమూలపు సురేష్
మే 3 వరకు లాక్డౌన్ పొడిగింపు దృష్ట్యా పదో తరగతి పరీక్షలు ప్రస్తుతం నిర్వహించలేకపోతున్నట్లు విద్యాశాఖ మంత్రి ఆదిమూలపు సురేష్ తెలిపారు. పరీక్షలు జరిగేంత వరకు విద్యార్థులకు సప్తగిరి ఛానల్ ద్వారా పాఠాలు బోధిస్తామన్నారు. ప్రతిరోజూ ఉదయం 10 గంటల నుంచి 11 వరకు, సాయంత్రం 4 గంటల నుంచి 5 గంటల వరకు పాఠాలు ప్రసారం అవుతాయని మంత్రి వివరించారు. ఆ పాఠాలు యూట్యూబ్ సప్తగిరి ఛానల్లోనూ అందుబాటులో ఉంచుతామన్నారు.
విద్యామృతం పేరుతో కార్యక్రమం రూపొందించామని, అందుకుగాను అన్ని శాఖల పరిధిలోని పాఠశాలల నుంచి అధ్యాపకులను ఎంపిక చేసినట్లు మంత్రి చెప్పారు. విద్యార్థులు సమయాన్ని వృథా చేయకుండా తరగతులను వినియోగించుకోవాలన్నారు. ఆన్లైన్లో చెప్పడానికి ఉత్సాహం ఉన్న ఉపాధ్యాయలు ముందుకురావచ్చని మంత్రి కోరారు.