తెలంగాణ రాష్ట్రంలో హుజూరాబాద్ను శాయశక్తులా అభివృద్ధి చేశానని భాజపా నేత, అక్కడి మాజీ ఎమ్మెల్యే ఈటల రాజేందర్ అన్నారు. హుజూరాబాద్లో పెద్దగా పెండింగ్‌ పనులు లేవని స్పష్టం చేశారు. అయితే.. చేసిన పనులకు చాలా మందికి బిల్లులు రావడం లేదని ఆరోపించారు. తనకు భాజపా నేతల నుంచి పూర్తి సహకారం ఉందని స్పష్టం చేశారు. తనది కారు గుర్తు అని తెరాస నేతలు ప్రచారం చేస్తున్నారని ఆగ్రహించారు. మూడు నెలల నుంచి ప్రచారం చేస్తున్నా.. ఎన్నికల్లో గెలిచేది తనే అని ఈటల అభిప్రాయపడ్డారు. మధ్యాహ్న భోజన నిర్వాహకులకు డబ్బులు చెల్లించట్లేదని మండిపడ్డారు. భూములు విక్రయించి హుజూరాబాద్లో డబ్బులు ఇస్తున్నారని ఆరోపించారు.
హరీశ్రావు ఎంత చేసినా.. ప్రజలు నమ్మే స్థితిలో లేరని చెప్పారు. తన మీద తప్పుడు ఆరోపణలు చేస్తే.. చరిత్ర క్షమించదని అన్నారు. 18 సంవత్సరాల అనుబంధం ఉందని.. అవన్నీ మర్చిపోయి.. ఇలా ఆరోపణలు చేయవద్దని హెచ్చరించారు. మోసపు మాటలు హుజూరాబాద్ ప్రజలెవ్వరూ నమ్మరని.. దుబ్బాకలో ఫలితాలే హుజూరాబాద్‌లోనూ పునరావృతం కావడం ఖాయమని ధీమా వ్యక్తం చేశారు. తనకున్న ఆస్తులు, నియోజకవర్గ అభివృద్ధిపై బహిరంగ చర్చకు సిద్దమని మంత్రి హరీశ్‌రావుకు ఈటల సవాల్ విసిరారు. ఎమ్మెల్యే కాకుండానే మంత్రి అయ్యావని హరీశ్పై మండిపడ్డారు. "మామ నియోజకవర్గంలో వరుసగా గెలుస్తున్నావ్.. కానీ నేను ఒక్క అవకాశం తీసుకుని ఇప్పటివరకూ ఓటమి లేకుండా ప్రజల ప్రేమను పొందిన వాడిని" అని చెప్పారు.
హుజూరాబాద్లో అభివృద్ధి జరగలేదన్నారు. నువ్వు నిన్న తిరిగిన రోడ్లు అన్ని నేను వేయించినవే. 2018లో 50 మహిళా సంఘాలకు 10 లక్షల రూపాయలు ఇచ్చాను. ఈరోజు మీరు ఓట్ల కోసం ఇస్తున్నారు. హుజూరాబాద్లో 3,900 ఇళ్లు మంజూరు అయ్యాయి. తెలంగాణ ఏర్పడిన తర్వాత హుజూరాబాద్ నియోజకవర్గ రూపురేఖలు మార్చాను. 18 చెక్డ్యాంలు కట్టించా. 1050 కోట్లతో ఎస్సారెస్పీ కాలువలు బాగు చేయించా. హుజూరాబాద్, జమ్మికుంట పట్టణాలకు ఒక్కోదానికి 40 కోట్ల రూపాయలు మంజూరు చేస్తే.. ఇవ్వకుండా ఆపింది కేటీఆర్. మళ్లీ ఇవే డబ్బులు మంజూరు చేస్తామంటూ జీవో ఇచ్చారు. ఇప్పటికే 192 కోట్ల రూపాయలు హుజూరాబాద్లో ఖర్చు పెట్టారు. నన్ను ఓడగొట్టడానికి కేసీఆర్.. ప్రతిపక్ష నేతలకు డబ్బులు ఇచ్చారు. - ఈటల రాజేందర్, మాజీ మంత్రి, భాజపా నేత
ఇదీ చదవండి:ETELA RAJENDER: ఎవరెన్ని కుట్రలు చేసినా గెలుపు నాదే