కర్ఫ్యూ పొడిగింపుపై సీఎంతో చర్చించాం: డీజీపీ

జనతా కర్ఫ్యూలో ప్రజలు చాలా సహనం చూపించారని డీజీపీ గౌతం సవాంగ్ కొనియాడారు. విజయవాడలో జనతా కర్ఫ్యూను పరిశీలించిన ఆయన... మీడియాతో మాట్లాడారు. విదేశాల నుంచి రాష్ట్రానికి వచ్చేవారు కచ్చితంగా తమ సమాచారాన్ని తెలియజేయాలని కోరారు. లేనిపక్షంలో చట్టరీత్యా చర్యలు తీసుకుంటామని స్పష్టం చేశారు.

విదేశాల నుంచి రాష్ట్రానికి వచ్చేవారు కచ్చితంగా తమ సమాచారాన్ని వైద్య, ఆరోగ్యశాఖకు ఇవ్వాలని డీజీపీ గౌతం సవాంగ్ కోరారు. లేనిపక్షంలో చట్టరీత్యా చర్యలు తీసుకుంటామని హెచ్చరించారు. విదేశాల నుంచి వచ్చిన వారికే ఎక్కువగా కోవిడ్‌-19 లక్షణాలు బయట పడుతున్నాయని... అందుకే జాగ్రత్తలు తీసుకోవాలని సూచిస్తున్నట్టు చెప్పారు. తల్లిదండ్రులు, కుటుంబసభ్యులు పూర్తిగా సహకారం అందించాలని కోరారు. ప్రభుత్వ సూచనల ప్రకారం విధిగా ఇంట్లోనే ఐసోలేషన్‌లో ఉండాలని సూచించారు. విదేశాల నుంచి వచ్చేవారి వివరాలను గోప్యంగా ఉంచడం, హోం ఐసోలేషన్‌ పాటించకపోవడం, సమాచారాన్ని దాచిపెట్టడం, వైద్య ఆరోగ్య శాఖ సూచనలు పాటించకపోవడం చట్టరీత్యా నేరమని వివరించారు. అలాంటి వారిపై కఠిన చర్యలకు వెనుకాడబోమని స్పష్టం చేశారు.

కర్ఫ్యూ పొడిగింపుపై అభ్యర్థనలు...

కరోనా వైరస్ వ్యాప్తి నిరోధంలో ప్రజలు చాలా సహనం చూపించారని డీజీపీ గౌతం సవాంగ్‌ అన్నారు. జనతా కర్ఫ్యూలో అంతా స్వచ్ఛందంగా భాగస్వాములు అయ్యారని తెలిపారు. మరో రెండు మూడు రోజులు కర్ఫ్యూ పొడిగింపుపై ప్రజల నుంచి అభ్యర్థనలు వచ్చాయని చెప్పారు. ముఖ్యమంత్రితో జరిగిన సమీక్షలోనూ ఇదే అంశంపై చర్చ జరిగిందని చెప్పారు.

ఇదీ చదవండి :