'కొవిడ్​ మృతుల ఎక్స్​గ్రేషియా విషయంలో కేంద్ర ప్రభుత్వ వైఖరి సరికాదు'

కొవిడ్​ మృతుల ఎక్స్​గ్రేషియా విషయంలో కేంద్ర ప్రభుత్వ వైఖరి సరైంది కాదని సీపీఐ జాతీయ కార్యదర్శి నారాయణ అన్నారు. దీనిపై సుప్రీంకోర్టు అడిగిన ప్రశ్నలకు కేంద్రం సమాధానం చెప్పిన తీరుని ఆయన తప్పు పట్టారు.

కొవిడ్​ మృతుల ఎక్స్​గ్రేషియా విషయంలో కేంద్ర ప్రభుత్వం వ్యవహరిస్తున్న తీరుపై సీపీఐ జాతీయ కార్యదర్శి నారాయణ ఆగ్రహం వ్యక్తం చేశారు. కరోనాతో మరణించిన వారికి ఐదు లక్షలు ఎక్స్​గ్రేషియా ఇవ్వటానికి ఇబ్బందేంటని సుప్రీంకోర్టు ప్రశ్నిస్తే... దివాలా తీసినట్లుగా కేంద్రం సమాధానం చెప్పటం సమంజసం కాదని మండిపడ్డారు. దాదాపు నాలుగు లక్షల మంది వైరస్​ కారణంగా మృతి చెందారని ఆయన వెల్లడించారు. వారందరికీ సుమారు 14 వేల కోట్ల రూపాయలు ఖర్చు అవుతుందని కేంద్ర ప్రభుత్వం వెనకాడుతుండటం సరైన చర్య కాదన్నారు.

కొవిడ్​ వ్యాప్తితో దేశం అతలాకుతలం అవుతున్న సమయంలోనే కార్పొరేట్​ కంపెనీలకు రూ.18లక్షల కోట్లు దారాదత్తం చేసినప్పుడు.. ప్రభుత్వం వద్ద డబ్బులు లేవనే సంగతి గుర్తు రాలేదా అని ప్రశ్నించారు. పీఎం కేర్​ ఫండ్​కి వచ్చిన డబ్బంతా ఏం చేశారన్నారు. విపత్తు నుంచి మానవ వనరులను కాపాడుకోలేకపోతే.. దేశాభివృద్ధి నిలిచిపోతుందని పేర్కొన్నారు. కేంద్రానికి ప్రజలు కావాలో.. కార్పొరేట్​ సంస్థలు కావాలో తేల్చుకోవాలన్నారు.

ఇదీ చదవండి:CM Jagan: కొవిడ్ వ్యాప్తిపై మరింత అప్రమత్తంగా ఉండాలి: సీఎం జగన్