ముఖ్యమంత్రి జగన్ మోహన్‌రెడ్డిని తెలుగు సినీ పరిశ్రమకు చెందిన ప్రముఖులు కలిశారు. తాడేపల్లిలోని సీఎం క్యాంపు కార్యాలయానికి వచ్చిన వారు... జగన్తో భేటీ అయ్యారు. అగ్రనటులు చిరంజీవి, నాగార్జున, దర్శకుడు రాజమౌళి, నిర్మాతలు సురేశ్‌బాబు, సి.కల్యాణ్, దిల్‌రాజు తదిరులు సీఎంను కలిసిన వారిలో ఉన్నారు.
సినీ పరిశ్రమ అభివృద్ధి, సమస్యలు, పరిష్కారంపై ఈ సందర్భంగా సీఎంతో చర్చించారు. రాష్ట్రంలో ఉచితంగా సినిమా చిత్రీకరణలకు అనుమతి ఇచ్చినందుకు కృతజ్ఞతలు తెలిపారు. విశాఖలో ల్యాబ్‌ ఏర్పాటుపై అనుమతి ఇవ్వాలని ఇప్పటికే లేఖ రాయగా, ఈ అంశంపైనా చర్చించినట్లు సమాచారం.
మంగళవారం ఉదయం హైదరాబాద్‌ నుంచి విమానంలో గన్నవరం వచ్చిన సినీ ప్రముఖులు... అక్కడి నుంచి రోడ్డు మార్గం ద్వారా భాజపా నేత గోకరాజు గంగరాజు అతిథి గృహానికి వెళ్లారు. అక్కడ బస చేసిన తర్వాత సీఎం క్యాంపు కార్యాలయానికి వెళ్లారు. అగ్ర కథానాయకుడు చిరంజీవి నేతృత్వంలో 25మంది సినీ ప్రముఖుల బృందం సీఎం జగన్‌ను కలవాలని అనుకున్నారు.