వీవీప్యాట్ స్లిప్పుల లెక్కింపుపై రివ్యూ పిటిషన్

సుప్రీంకోర్టు లో వీవీప్యాట్ స్లిప్పుల లెక్కింపుపై 21 పార్టీలు రివ్యూ పిటిషన్ దాఖలు చేశాయి. 50 శాతం వీవీ ప్యాట్ లెక్కించేలా ఈసీకి ఆదేశాలు ఇవ్వాలని పార్టీలు కోరాయి.

ఈవీఎంల అంశంపై ప్రతిపక్షాలు మరోసారి సుప్రీంకోర్టు తలుపుతట్టాయి. వీవీప్యాట్ యంత్రాల్లోని స్లిప్పులు 50 శాతం లెక్కించాలని పట్టుబడుతున్నాయి. ఈ మేరకు ఎన్నికల సంఘానికి ఆదేశాలు ఇవ్వాలని అభ్యర్థనతో సర్వోన్నతన్యాయస్థానంలో రివ్యూపిటిషన్ వేశాయి. 21 పార్టీలు ఈ వ్యాజ్యం దాఖలు చేశాయి. గతంలో 50 శాతం పెంచాలన్న పిటిషన్‌పై విచారించిన ధర్మాసనం... ఒక్కో అసెంబ్లీ నియోజకవర్గంలో 5 వీవీ ప్యాట్ యంత్రాల స్లిప్పులు లెక్కించాలని ఈసీని ఆదేశించింది. దీని వల్ల పారదర్శకత రాదని... 50 శాతం తప్పనిసరిగా లెక్కించేలా అదేశాలివ్వాలని ప్రతిపక్షాలు కోరుతున్నాయి. ఎన్నికల సంఘం చెబుతున్నట్టు రోజుల సమయం పట్టదని... గంటల వ్యవధిలోనే ప్రక్రియ పూర్తవుతుందని న్యాయస్థానం ముందు వాదనలు వినిపించనున్నాయి. ఈ మేరకు దఫదఫాలుగా చర్చించి.... ఈ రివ్యూ పిటిషన్ వేశాయి పార్టీలు