'అవినీతి నిరూపిస్తే.. జైలుకెళ్లేందుకు సిద్ధం'

అసెంబ్లీలో మంత్రి అనిల్ కుమార్ యాదవ్ ప్రవర్తించిన తీరు అభ్యంతరకరంగా ఉందని ఆత్మకూరు తెదేపా నేత కన్నబాబు అన్నారు. నీరు-చెట్టు పథకంలో అవినీతి జరిగిందని నిరూపిస్తే జైలుకెళ్లడానికైనా సిద్ధమని స్పష్టం చేశారు.

నెల్లూరు జిల్లా ఆత్మకూరులో తెదేపా నేత మురళి కన్నబాబు విలేకరుల సమావేశం నిర్వహించారు. సోమవారం నాటి అసెంబ్లీ సమావేశాల్లో జలవనరులశాఖ మంత్రి అనిల్ కుమార్ యాదవ్ ప్రవర్తించిన తీరు అభ్యంతరంగా ఉందని మురళి కన్నబాబు అన్నారు. గౌరవనీయ మంత్రి పదవిలో ఉన్న ఆయన ఓ వీధి నాయకుడిలా మాట్లాడారని విమర్శించారు. కనీస అవగాహన లేని వ్యక్తికి జల వనరుల శాఖను కట్టబెట్టడం ఏమిటని అన్నారు. నీరు-చెట్టు పనుల్లో భారీ అవినీతి జరిగిందని వైకాపా నాయకులు చేస్తున్న ఆరోపణలను రుజువు చేయాలని సవాల్ విసిరారు. అవినీతి జరిగిందని నిరూపిస్తే మొదటిగా నెల్లూరు జిల్లాకు చెందిన వైకాపా ఎంపీ ఆదాల ప్రభాకర్ రెడ్డి, వెంకటగిరి ఎమ్మెల్యే ఆనం రామనారాయణ రెడ్డిపై చర్యలు తీసుకోవాలన్నారు. తెలుగుదేశం కార్యకర్తలు జైలుకెళ్లడానికైనా సిద్ధంగా ఉన్నామన్నారు.

ఇదీ చదవండి :కరకట్ట ఇళ్లు ఖాళీ చేయిస్తాం-ఆళ్ల రామకృష్ణారెడ్డి