అంతా వాళ్లే చేశారు ! - తప్పుడు ఫాం-7లు దరఖాస్తు చేసి అడ్డంగా దొరికిపోయిన వైసీపీ నాయకులు

YSRCP Leaders Fake Form 7 Applications: ఓట్ల దొంగలు వైసీపీ నాయకులేనని తేలిపోయింది. ఫాం-7 దరఖాస్తులు సమర్పించింది ఆ పార్టీ నేతలేనని ఆధారాలు దొరికినా పోలీసులు కొరడా తీయడం లేదు. స్వయంగా కేంద్రం ఎన్నికల సంఘమే బాధ్యులపై చర్యలకు ఆదేశించినా లెక్క చేయడం లేదు. ఓట్ల దందాలో సూత్రధారులను పట్టించుకోవడం లేదు.

YSRCP Leaders Fake Form 7 Applications: రాష్ట్రంలో తటస్థులు, ప్రతిపక్ష పార్టీల సానుభూతిపరులు, మద్దతుదారుల ఓట్ల తొలగింపునకు తప్పుడు ధ్రువీకరణలు, సమాచారంతో ఫాం-7 దరఖాస్తులు చేసిందీ, చేయించిందీ వైసీపీ వారేనని తేటతెల్లమైంది. ఎన్నికల అధికారుల ఫిర్యాదుల మేరకు తప్పుడు ఫాం-7ల వ్యవహారంపై రాష్ట్రవ్యాప్తంగా 10 జిల్లాల్లోని 13 నియోజకవర్గాల్లో 70 కేసులు నమోదయ్యాయి. వాటిలో అత్యధిక కేసుల్లో వైసీపీ నాయకులే నిందితులు. వారిని వెనక నుంచి నడిపిస్తున్నదెవరు? ఎవరి ఆదేశాల మేరకు వారు తప్పుడు ఫాం-7 దరఖాస్తులు చేశారు ? అనేది అంతుచిక్కని ప్రశ్నగా మిగిలిపోతోంది.

గుంటూరు పశ్చిమ నియోజకవర్గంలో ఫాం-7 దరఖాస్తుల కుట్రలో, 42వ డివిజన్‌ వైసీపీ ఇంఛార్జి చల్లా శేషారెడ్డి ప్రధాన పాత్ర పోషించారు. ఆయనతో పాటు వైసీపీ బూత్‌ ఏజెంట్లుగా పనిచేస్తున్న కొండా శేషారెడ్డి, ఎల్‌.రాము, వైసీపీ నాయకుడు పులుసు వెంకటరెడ్డి, సిద్ధి వెంకాయమ్మలపై పట్టాభిపురం పోలీసుస్టేషన్‌లో కేసు నమోదైంది. మూడు రోజుల్లో 979 మంది ఓట్ల తొలగింపునకు వారు నకిలీ ఫాం-7లు పెట్టారు. అందులో 939 మంది అర్హులేనని విచారణలో తేలింది.

తెలుగుదేశం రాష్ట్ర అధ్యక్షుడు అచ్చెన్నాయుడు ప్రాతినిధ్యం వహిస్తున్న శ్రీకాకుళం జిల్లా టెక్కలిలో అర్హుల ఓట్ల తొలగింపునకు గతంలో వైసీపీ ఇంఛార్జిగా వ్యవహరించిన దువ్వాడ వాణి వ్యక్తిగత కార్యదర్శి చింతాడ సాయికుమార్‌తో పాటు వైసీపీ నాయకులు ఏదూరు రాజశేఖర్‌, వాన రాము, కణితి మురళి నకిలీ ఫాం-7లు పెట్టారు. 60కు పైగా పోలింగ్‌ కేంద్రాల్లో ఓట్ల తొలగింపునకు వీరు వందల ఫాం-7 దరఖాస్తులు పెట్టడంతో నందిగాం, కోటబొమ్మాళి పోలీసు స్టేషన్‌లలో మోసం, ప్రజాప్రాతినిధ్య చట్టంలోని సెక్షన్‌ 31ఏ కింద వీరిపై రెండు కేసులు నమోదయ్యాయి.

కాకినాడ నగర నియోజకవర్గంలో నకిలీ ఫాం-7లకు సంబంధించి 23 కేసులు నమోదు అయ్యాయి. వీటిలో 50 మందికి పైగా నిందితులుంటే.. ఎక్కువమంది వైసీపీ కార్యకర్తలే. తిరుపతి జిల్లా చంద్రగిరి నియోజకవర్గంలో అధికారపార్టీ ముఖ్యనేత ఆధ్వర్యంలోనే తప్పుడు దరఖాస్తుల దందా సాగింది. పది కేసులు నమోదైనా ఒక్క దానిలోనూ కీలకనేతను నిందితుడిగా చేర్చలేదు.

బాపట్ల జిల్లా పర్చూరు నియోజకవర్గంలో ఫాం-7 దరఖాస్తుల దాఖలుపై టీడీపీ ఎమ్మెల్యే ఏలూరి సాంబశివరావు హైకోర్టును ఆశ్రయించడంతో ఎన్నికల సంఘం అధికారులు కొందరు వైసీపీ నాయకులపై ఫిర్యాదు చేశారు. 16 కేసులు నమోదైనా అక్రమాలకు కారణమైన అరాచక అధికారపార్టీ నేత పేరే చేర్చలేదు. ఇలా తప్పుడు దరఖాస్తులు చేసింది వైసీపీ వారేనని తేలినా, ఆ పార్టీ పెద్దలు, ముఖ్యుల్ని విచారించకుండా పోలీసులు తాత్సరం చేస్తున్నారు! తప్పనిసరి పరిస్థితుల్లో కేసులు నమోదుచేశారే తప్ప నిందితులైన ఏ ఒక్క వైసీపీ నాయకుడినీ పోలీసులు విచారించలేదు. అరెస్టూ చేయలేదు.

ప్రతిపక్షపార్టీల సానుభూతిపరులైన ఓటర్ల సంతకాలు ఫోర్జరీ చేసి, ఓట్లు తొలగించాలని వారే స్వయంగా దరఖాస్తు చేసుకున్నట్లుగా ఫాం-7లు పెట్టారు. మరికొన్నిచోట్ల అసలు ఉనికిలోనే లేని వ్యక్తుల పేర్లతో తొలగింపు దరఖాస్తులు సమర్పించారు! బతికున్నవారు మృతిచెందినట్లు మరికొన్ని ఫాం-7లు అందించారు. వైసీపీ కొన్ని నెలలుగా ఈ అక్రమాల దందాను ఓ ఉద్యమంలా సాగించింది. ఎవరికి లబ్ధి చేకూర్చేందుకు తప్పుడు ఫాం-7లు దాఖలుచేశారు.

వాటి ద్వారా ఓట్ల తొలగిస్తే అంతిమ ప్రయోజనం దక్కేది ఎవరికనే కోణంలో మూలాల్లోకి వెళ్లి దర్యాప్తు జరపాలని ఇటీవల విజయవాడ పర్యటనకు వచ్చిన సమయంలో కేంద్ర ఎన్నికల సంఘం ప్రధాన కమిషనర్‌ రాజీవ్‌కుమార్‌ ఆదేశించారు. క్షేత్రస్థాయిలో ఆ ఆదేశాలు అమలు కావట్లేదు. ఎన్నికల సంఘం తన పర్యవేక్షణలో పనిచేసేలా సీనియర్‌ ఐపీఎస్‌ అధికారులతో ప్రత్యేక దర్యాప్తు బృందాన్ని నియమిస్తే సూత్రధారులు బయటకొస్తారని విపక్షాలు కోరుతున్నాయి.