పందెంలో గెలిస్తే కాసులు కురిపిస్తా - ఓడితే నోరూరిస్తా - చనిపోయిన కోడికి రూ.లక్ష!

పందెంలో పాల్గొనబోయే కోడికి రూ.లక్షలు వెచ్చించడం విన్నాం - ఇందుకు భిన్నంగా పందెంలో చనిపోయిన పుంజునూ రూ.లక్ష పెట్టి కొనుగోలు

Kodi Pandalu 2025 in AP : సంక్రాంతి సందడి ముగిసింది. రాష్ట్రవ్యాప్తంగా కోడి పందేలను జోరుగా నిర్వహించిన విషయం తెలిసిందే. పందెం కోడి కత్తి ధాటికి నోట్ల కట్టలు తెగిపడ్డాయి. పండగ మూడు రోజులూ కోళ్లు కాదు రూ.కోట్లు గాల్లోకి ఎగిరాయి. బరిలో దిగిన కోడి గెలిస్తే ప్రపంచాన్ని జయించిన ఆనందం. ఓడిపోతే తట్టుకోలేని అవమానాలు సర్వసాధారణం. కోడిపుంజు మెడమీద ఈకలు రెక్కించి ఒక్క ఉదుటున గాలిలోకి లేచి ప్రత్యర్థిని పడగొట్టే దృశ్యం పందెం రాయుళ్లకు కావాల్సినంత కిక్​ని ఇచ్చింది!

రాత్రిపూట కూడా పందేలు నిర్వహించేలా ఫ్లడ్‌లైట్ల వెలుగులు, గెలుపోటములపై అనుమానాలు తలెత్తకుండా టీవీ రీప్లేలు, ప్రజలు వీటిని వీక్షించేలా ప్రత్యక్షప్రసారాలు చేశారు. జనాన్ని నియంత్రించేందుకు బౌన్సర్ల బందోబస్తుతో బరులన్నీ కార్పొరేట్‌ స్థాయిని సంతరించుకున్నాయి. మద్యం పరవళ్లు, మాంసాహార విందులతో ప్రతి బరిలోనూ పండగే అన్నట్లుగా సాగింది. దీంతో కోళ్లు ఢీ అంటే ఢీ అంటూ సై అంటే సై అంటూ హోరాహోరీగా తలపడి రక్తం చిందించాయి.

అయితే ప్రత్యర్థిని పడగొట్టిన కోళ్లు పందెం సొమ్ము గెలిస్తే ఓడినవి మాత్రం మాంసం ప్రియుల మనసు గెలిచాయి. బరిలో చనిపోయిన పందెం పుంజులకు కూడా డిమాండ్ చాలా ఉంది. ప్రాణాలు కోల్పోయాక కూడా వాటిని కొనేందుకు కొందరు ఆస్తక్తిని కనబరుస్తున్నారు. వీటిని పోటీపడి మరీ దక్కించుకుంటున్నారు. తాజాగా పందెంలో చనిపోయిన పుంజునూ రూ.లక్ష పెట్టి కొనుగోలు చేయడం అందరిని ఆశ్చర్యానికి గురిచేసింది.

Eluru Pandem kodi at One Lakh :ఏలూరు ఎన్‌ఆర్‌పేటకు చెందిన ఆహ్లాద్, రాజేంద్ర, రాజవంశీ పందెం పుంజును పెంచారు. ఆ కోడి గురువారం పందెంలో పోరాడి ఓడింది. పుంజు పోరాట పటిమ నలుగురికీ తెలియాలని దాన్ని శుక్రవారం వేలం వేశారు. ఆసక్తి ఉన్న పలువురు వేలంలో పాల్గొన్నారు. కోసి, కాల్చిన ఆ కోడిని ఏలూరు గ్రామీణ మండలం జాలిపూడికి చెందిన మాగంటి నవీన్‌ చంద్రబోస్‌ రూ.1,11,111కు దక్కించుకున్నారు. ఈ విషయాన్ని నవీన్‌ చంద్రబోస్‌ ఇన్‌స్టాగ్రాంలో పంచుకున్నారు. మొత్తానికి పందెంకోళ్లు చచ్చినా బతికినా కాసులు కురిపిస్తున్నాయని పలువురు కామెంట్ చేస్తున్నారు. ప్రాణాలు విడిచినా పసందైన వంటకంగా జిహ్వచాపల్యాన్ని తీరుస్తున్నాయని అంటున్నారు.