விவசாயி தோட்டத்தில் புகுந்து யானைக் கூட்டம் செய்த அதகளம்! - THENI NEWS TODAY

தேனி: ஆண்டிபட்டி அருகே தாழையூத்து மலையடிவார பகுதியில் அமைந்துள்ள விவசாய தோட்டங்களில் இரவில் புகுந்த யானைக் கூட்டம் 20க்கும் மேற்பட்ட தென்னை மரங்களை சேதப்படுத்தி உள்ளது. ஒரு குட்டி யானையுடன் வந்து தென்னை மரங்களை யானைகள் சேதப்படுத்திய வீடியோ காட்சிகள் வெளியாகியுள்ளன. இதுகுறித்து கண்டமனூர் வனத்துறையினர் விசாரித்து வருகின்றனர்.

தேனி மாவட்டம் ஆண்டிபட்டி தாலுகாவிற்குட்பட்ட தாழையூத்து மலையடிவார பகுதியில் அமைந்துள்ள சிலம்பரசன் என்பவரது தென்னந்தோப்பிற்குள் இரவில் புகுந்த யானைக் கூட்டம் தென்னங்குருத்திற்காகவும், தென்னங்கிழைகளுக்காகவும் 20க்கும் மேற்பட்ட தென்னை மரங்களை சேதப்படுத்தி உள்ளன.

ஒரு குட்டியோடு மூன்று யானைகள் வந்து தென்னை மரத்தை இரவில் சேதப்படுத்திய சிசிடிவி காட்சிகளும் வெளியாகி உள்ளன. 

இதுகுறித்து விவசாயி கொடுத்த புகாரின் பேரில் சிசிடிவி காட்சிகளை வைத்து கண்டமனூர் வனத்துறையினர் விசாரணை மேற்கொண்டு வருகின்றனர்.

தொடர்ந்து அடிக்கடி இந்த பகுதியில் தென்னை மரங்களை யானைக் கூட்டம் சேதப்படுத்தி வருவதால் விவசாயிகள் மிகவும் அச்சமடைந்துள்ளனர்.

விவசாயிகளின் அச்சத்தை போக்கும் வகையில் தொடர்ந்து இரவு நேர பாதுகாப்பு பணியில் ஈடுபட்டு வரும் வனத்துறையினர் , யானைகளை வனப்பகுதிக்குள் விரட்டுவதற்கான முயற்சிகளை மேற்கொண்டு வருவதாக தெரிவித்துள்ளனர்.