சென்னை: மத்திய அரசின் வக்ஃபு திருத்தச் சட்டம் 2024-ஐ எதிர்த்து தமிழ்நாடு இஸ்லாமிய இயக்கங்கள் மற்றும் அரசியல் கட்சிகளின் சார்பில் மாபெரும் ஆர்ப்பாட்டம் நேற்று சென்னை ராஜரத்தினம் மைதானம் அருகில் நடைபெற்றது. இதில் விடுதலை சிறுத்தைகள் கட்சித் தலைவர் திருமாவளவன் கலந்து கொண்டார்.
மேடையில் பேசிய திருமாவளவன், “பல் பிடுங்கப்பட்ட பாம்பாக இந்த முறை பாஜக ஆட்சிக்கு வந்துள்ளது. எப்போது வேண்டுமானாலும் ஆட்சி கவிழும் என்ற நிலையில் சந்திரபாபு நாயுடு மற்றும் நிதிஷ் தயவால் ஆட்சி நடந்து வரும் நிலையில், இஸ்லாமியர்கள் மீதான வெறுப்பை வெளிக்காட்டும் விதமாக வக்ஃபு திருத்தச் சட்டத்தைக் கொண்டு வந்துள்ளனர்.
கற்பனைகளையும், யூகங்களையும் பரப்பி விசிகவிற்கும் - திமுகவிற்கும் கசப்பை ஏற்படுத்தி, தமிழ்நாட்டில் இந்தியா கூட்டணியில் பாதிப்பை ஏற்படுத்த முயற்சிக்கிறார்கள். அது நடக்காது. தமிழ்நாட்டைப் போன்று இந்தியா கூட்டணி பிற மாநிலங்களிலும் வலுவாக உருவாக வேண்டும். திமுக தலைமையிலான இந்தியா கூட்டணி மிகவும் சிறப்பாக செயல்படுகிறது" என்றார்.
பின்னர் செய்தியாளர்களைச் சந்தித்து திருமாவளவன் பேசியதாவது, “மது ஒழிப்புக்காக போராடிய காந்தி பிறந்தநாளில் மாநாடு நடத்தினோம். அவரது சிலைக்கு மரியாதை செலுத்தச் சென்றபோது, ஆளுநர் வந்த பிறகு தான் அனுமதிக்க முடியும் என காவல் துறையினர் தெரிவித்தனர். மாநாட்டுக்குச் செல்ல வேண்டியிருந்ததால், காத்திருக்க முடியவில்லை. மாலை அணிவிக்கத்தான் காந்தி மண்டபம் சென்றேன். இதை குற்ற உணர்வில் திரும்பிச் சென்றதாக கூறுவது எப்படி சரி? என்று கேள்வி எழுப்பினார்.
இதையும் படிங்க:"திருமாவளவன் நாகரீகமான தலைவர் என நினைத்தேன்.. ஆனால்.." - தமிழிசை வேதனை
என் மனம் புண்படாதா?: தமிழிசை செளந்தரராஜன் மீது மிகுந்த மதிப்பும், நல்ல நட்பும் உள்ளது. தமிழிசை செளந்தரராஜன் குறித்து நான் பேசிய கருத்தால் அவரது மனம் காயப்பட்டு இருந்தால் அதற்காக வருந்துகிறேன். என்னைப் பற்றி தமிழிசை பேசிய கருத்து என்னை காயப்படுத்தாதா? அவரது விமர்சனத்தால் என் மனம் புண்படாதா? எனக்கு ஏதோ ஈடுபாடு இருப்பதாக மறைமுகமாக கூறினார்.
எனவே, உங்களைப் போல் தான் நானும் என்று சொன்னேன். இதில் தரம் தாழ்ந்து பேச என்ன இருக்கிறது என தெரியவில்லை. இது அவரை காயப்படுத்தியிருந்தால் வருந்துகிறேன். என்னைக் காயப்படுத்தும் வகையில் பொதுமக்களிடையே திருமாவளவனுக்கு மது ஒழிப்புக் கொள்கையில் முரண்பாடு இருப்பதாகச் சொன்னதால் நான் பதிலளித்தேன்” என்று தெரிவித்தார்.
முதலமைச்சர் சந்தித்த ஒரு வார காலத்திற்குள் மெட்ரோ இரண்டாம் கட்டத்திற்கு மத்திய அரசு நிதி ஒதுக்கீடு செய்திருப்பதில் அரசியல் உள்ளதா? என்ற கேள்விக்கு பதில் அளித்த அவர், “கேட்க வேண்டியது மாநில அரசின் உரிமை, மத்திய அரசு அதன் கடமையைச் செய்துள்ளது. இதில் அரசியல் இருப்பதாக தெரியவில்லை” என்றார்.
தொடர்ந்து பேசிய அவர், “தலித் மக்கள் மீதான ஆளுநர் ரவியின் கரிசனத்திற்கு நன்றி. பாஜக ஆளும் பிற மாநிலங்களில் தலித்துகளின் நிலை என்ன என்பதையும் அவர் பார்க்க வேண்டும். தமிழ்நாட்டில் தலித்துகளின் நிலை குறித்து ஆளுநர் சொன்னது உண்மை என்றால், தமிழ்நாடு அரசு நடவடிக்கை எடுக்க வேண்டும். வேங்கை வயல் கழிவுநீர் தொட்டியில் மனிதக்கழிவு கலக்கப்பட்ட விவகாரத்தில் அரசின் நடவடிக்கைக்காக பொறுத்திருப்போம்.
விரைவில் 500 மதுக்கடைகளை தமிழக அரசு மூட இருப்பதாக செய்திகள் வருவது விடுதலை சிறுத்தைகள் மாநாட்டிற்கு கிடைத்த வெற்றியா? என்ற கேள்விக்கு பதில் அளித்த அவர், அது குறித்து அதிகாரப்பூர்வ அறிவிப்பு வெளியாகட்டும்” என தெரிவித்தார்.
முன்னதாக, “மது ஒழிப்பு மாநாடு நடத்துபவர், காந்தியை தவிர்த்துவிட்டு, காமராஜர் நினைவிடத்தில் மட்டும் மரியாதை செலுத்தி உள்ளார். மது ஒழிப்பை வலியுறுத்த முடியவில்லையே என்ற குற்ற உணர்வு காரணமா என்பது தெரியவில்லை” உள்ளிட்ட விமர்சனங்களை விசிக தலைவர் திருமாவளவனுக்கு எதிராக தமிழிசை முன்வைத்திருந்தார். இதற்கு பதில் அளித்த திருமாவளவவன், “தமிழிசை செளந்தராஜனுக்கு மதுபானம் குடிக்கும் பழக்கம் இருக்காது என்று நம்புகிறேன்’ என மது ஒழிப்பு மாநாட்டில் பேசியது சர்ச்சையானது.
ஈடிவி பாரத் தமிழ்நாடு (Credits - ETV Bharat Tamil Nadu) ஈடிவி பாரத் தமிழ் வாட்ஸ்ஆப் சேனலில் இணையஇங்கே க்ளிக் செய்யவும்
