தஞ்சாவூர்: தஞ்சை அடுத்த கரந்தை மிளகுமாரி செட்டி தெருவைச் சேர்ந்தவர் அறிவழகன் (40). இவர் தஞ்சை மீன் மார்க்கெட்டில் மீன் வெட்டும் தொழில் செய்து வந்தார். இவர் மீது தஞ்சையில் உள்ள பல்வேறு காவல் நிலையங்களில் கொலை உள்ளிட்ட பல்வேறு வழக்குகள் உள்ளன. அது மட்டுமல்லாமல், தஞ்சை நகர கிழக்கு காவல் நிலையத்தில் ரவுடிகள் பட்டியலிலும் அறிவழகன் பெயர் உள்ளது.
இந்நிலையில், நேற்று இரவு இவர் வீட்டில் இருந்தபோது, நண்பர்கள் வந்து அவரை வெளியில் அழைத்துச் சென்றுள்ளனர். இதனையடுத்து, அவர் தனது நண்பர்களுடன் சென்று அருகில் உள்ள புற்று மாரியம்மன் கோவில் தெருவில் இருக்கும் வடவாற்றங்கரையில் அமர்ந்து மது அருந்தி உள்ளார்.
அப்போது அங்கு வந்த மர்ம கும்பல் அறிவழகனை சரமாரியாக வெட்டினர். அப்போது, அவர்களிடம் இருந்து தப்பிச் செல்ல முயன்ற அவரை, அந்த கும்பல் தலை, கை உள்ளிட்ட இடங்களிலும் வெட்டியுள்ளனர். இதில் அறிவழகன் சம்பவ இடத்திலேயே ரத்த வெள்ளத்தில் துடிதுடித்து உயிரிழந்தார். பின்னர், அந்தக் கும்பல் அங்கிருந்து தப்பிச் சென்றுள்ளது.