சென்னை: 2024-25ஆம் நிதி ஆண்டுக்கான பட்ஜெட் கூட்டத் தொடர் ஜூலை 22ஆம் தேதி தொடங்கியது. இதனைத் தொடர்ந்து பொருளாதார ஆய்வறிக்கையை தாக்கல் செய்த நிதியமைச்சர் நிர்மலா சீதாராமன், ஜூலை 23ஆம் தேதி முழுமையான பட்ஜெட்டை தாக்கல் செய்தார். இதில் நடப்பு நிதியாண்டில் மாற்றுத்திறனாளிகள் நலனுக்காக மத்திய அரசு பட்ஜெட்டில் 0.02 சதவிகிதம் ஒதுக்கீடு செய்யப்பட்டுள்ளது. இது மாற்றுத்திறனாளிகள் இடையே பெரும் ஏமாற்றத்தை ஏற்படுத்தியுள்ளது.
இந்நிலையில், மாற்றுத்திறனாளிகளை புறக்கணிக்கும் மத்திய பட்ஜெட்டை கண்டித்து, தமிழ்நாடு அனைத்து வகை மாற்றுத்திறனாளிகள் மற்றும் பாதுகாப்போர் உரிமைகளுக்கான சங்கம் சார்பில், இன்று (ஜூலை 26) சென்னை நுங்கம்பாக்கம், சாஸ்திரி பவன் எதிரில் கண்டன ஆர்பாட்டம் நடைபெற்றது. இந்த ஆர்ப்பாட்டத்தில் பல்வேறு கோரிக்கைகளை முன்வைத்தும், மத்திய அரசு வெளியிட்ட நிதிநிலை அறிக்கை நகலை கிழித்தும் மாற்றுத்திறனாளிகள் தங்களின் ஆதங்கத்தை வெளிப்படுத்தினர்.
இது குறித்து மத்திய சென்னை அனைத்து வகை மாற்றுத்திறனாளிகள் சங்கம் மற்றும் பாதுகாப்போர் உரிமைக்கான சங்கத்தின் செயலாளர் எஸ்.மனோன்மணி ஈடிவி பாரத் தமிழுக்கு அளித்த பேட்டியில், “பாஜக அரசு கடந்த 2 முறை ஆட்சியில் இருந்த போதும் மாற்றுத்திறனாளிகளுக்கு எந்த உதவிகளும் செய்யவில்லை. மாற்றுத்திறனாளிகள் இந்தியாவில் இருக்கிறார்கள் என்பதை நிர்மலா சீதாராமன் மறந்துவிட்டார்.
அத்தியாவசிய பொருட்களுக்கு வரிகளை உயர்த்திவிட்டு, அத்தியாவசியமில்லாத பொருட்களுக்கான வரிகளை குறைத்துள்ளனர். கார்ப்பரேட் நிறுவனங்களுக்கு வரியில் சலுகைகள் கொடுத்துள்ளனர். மாற்றுத்திறனாளிகளுக்கான உபகரணங்களுக்கு நிதி ஒதுக்க வேண்டும். படித்தவர்களுக்கு வேலை வாய்ப்புகள் ஏற்படுத்தி கொடுக்க வேண்டும். மாற்றுத்திறனாளி குழந்தைகளுக்கு கல்வியை உறுதி செய்ய வேண்டும் என்று சட்டம் சொல்கிறது.