திமுக தேர்தல் விளம்பரம் விவகாரம்: தேர்தல் ஆணையம் பதிலளிக்கச் சென்னை உயர்நீதிமன்றம் உத்தரவு! - DMK ADVERTISEMENT ISSUE

DMK ADVERTISEMENT ISSUE: "இந்தியாவைக் காக்க ஸ்டாலின் அழைக்கிறேன்" என்ற விளம்பரங்களுக்குத் தடை விதிக்கப்பட்டதை எதிர்த்து திமுக விளக்கம் மட்டுமே கேட்க முடியும், ரத்து செய்ய வழக்கு தொடர முடியாது என தேர்தல் ஆணையம் சென்னை உயர்நீதிமன்றத்தில் தெரிவித்துள்ளது.

சென்னை:தமிழகத்தில்,18வது நாடாளுமன்ற மக்களவைத் தேர்தலுக்கு இன்னும் 4 தினங்களே உள்ள நிலையில், அரசியல் தலைவர்கள் இறுதிக் கட்ட பிரச்சாரத்தில் ஈடுபட்டு வருகின்றனர். இந்நிலையில் திமுக சார்பில் "இந்தியாவைக் காக்க ஸ்டாலின் அழைக்கிறேன்" என்ற விளம்பரங்களுக்கு முன் அனுமதி பெறுவது தொடர்பாகத் தேர்தல் ஆணையத்துடன் கடிதம் அனுப்பப்பட்டது.

திமுகவின் தேர்தல் விளம்பரம், விதிமுறைகளுக்கு எதிராக இருப்பதாகக் கூறி ஏப்ரல் 4 ம் தேதி அனுமதி மறுக்கப்பட்டது. இதை எதிர்த்து திமுக சார்பில் சென்னை உயர்நீதிமன்றத்தில் மனு தாக்கல் செய்யப்பட்டுள்ளது. அதில், மார்ச் 2023 புதிய விதிமுறைகளின் படி மாநில சரிபார்ப்பு குழு அனுமதி வழங்க வேண்டும்.

அனுமதி மறுக்கப்படுவதாக இருந்தால், அந்த விளம்பரங்கள் இரு தரப்பினரிடையே மோதலை ஏற்படுத்துவது, சமூகம் தொடர்பானதாக இருந்தால் அனுமதி மறுக்கலாம். ஆனால், தேர்தல் ஆணையர் உரிய விளக்கம் அளிக்காமல் அனுமதி மறுத்துள்ளது. அதனால், தேர்தல் ஆணையத்தின் அனுமதி மறுத்த உத்தரவை ரத்து செய்து விளம்பரத்தை வெளியிட அனுமதி வழங்க வேண்டும் என குறிப்பிடப்பட்டுள்ளது.

இந்த மனு உயர்நீதிமன்ற தலைமை நீதிபதி கங்கபூர்வாலா, நீதிபதி சத்யநாராயண பிரசாத் அமர்வில் இன்று (ஏப்ரல் 15) விசாரணைக்கு வந்தது. அப்போது தேர்தல் ஆணையம் சார்பில், புதிய விதிமுறைகளை எதிர்த்து உச்சநீதிமன்றத்தில் தான் வழக்கு தொடர முடியும், உயர்நீதிமன்றத்தில் தொடர முடியாது. மேலும், உயர்நீதிமன்றத்தில் விளம்பரம் அனுமதி மறுக்கப்பட்டதை எதிர்த்து விளக்கம் மட்டுமே கேட்க முடியும். தேர்தல் ஆணையத்தின் உத்தரவை ரத்து செய்யக்கோரி உயர்நீதிமன்றத்தில் வழக்கு தொடர முடியாது என தெரிவிக்கப்பட்டது.

இதையடுத்து, வழக்கை விசாரித்த நீதிபதிகள் பிறப்பித்த உத்தரவில், தேர்தல் ஆணையம் ஏப்ரல் 17ம் தேதி பதில் அளிக்க உத்தரவிட்டு வழக்கை ஒத்திவைத்தனர்.