நெல்லை அரசு பெண் ஊழியர் வீட்டில் லஞ்ச ஒழிப்பு போலீசார் அதிரடி சோதனை
திருநெல்வேலி: திருநெல்வேலி மாவட்டம், அம்பாசமுத்திரம் சங்கரய்யா தெருவைச் சேர்ந்தவர் முருகன். இவரது மனைவி வேலம்மாள் (54). இவர்களுக்கு 2 மகள்கள் உள்ள நிலையில், இருவருக்கும் திருமணம் ஆகிவிட்டது. சார்பதிவாளர் அலுவலகத்தில் வேலை பார்த்து வந்த முருகன், கடந்த 10 ஆண்டுகளுக்கு முன்பு இறந்துவிட்டார்.
இதையடுத்து, கருணை அடிப்படையில் முருகனின் மனைவி வேலம்மாளுக்கு அரசு வேலை கிடைத்துள்ளது. தற்போது அவர், விக்கிரமசிங்கபுரம் சார்பதிவாளர் அலுவலகத்தில் உதவியாளராக பணியாற்றி வருகிறார். இந்நிலையில், இவர் மீது வருமானத்திற்கு அதிகமாக சொத்து சேர்த்ததாக புகார் எழுந்துள்ளது. அந்த புகாரின் பேரில், திருநெல்வேலி மாவட்ட லஞ்ச ஒழிப்புத்துறை போலீசார், நேற்று (பிப்.22) வழக்குப் பதிவு செய்துள்ளனர்.