வேலூர்: நாட்டின் விடுதலைக்கு வித்திட்ட வேலூர் சிப்பாய் புரட்சியின் 218ஆம் ஆண்டின் நினைவு தினம் இன்று வேலூரில் அனுசரிக்கப்பட்டது. அதனையொட்டி, வேலூர் கோட்டை எதிரே உள்ள சிப்பாய் புரட்சி நினைவுத்தூணில் மாவட்ட ஆட்சியர் சுப்புலெட்சுமி மலர் வளையம் வைத்து அஞ்சலி செலுத்தினார். அதனைத் தொடர்ந்து, காவல்துறையினர், முன்னாள் ராணுவத்தினர், மற்றும் உள்ளாட்சி அமைப்பு பிரதிநிதிகள் உள்பட பலர் மலர் வளையம் வைத்து அஞ்சலி செலுத்தினர்.
பிரிட்டிஷ் ஆட்சிக் காலத்தில் வேலூர் கோட்டையில் இருந்த இந்திய சிப்பாய்களுக்கு எதிராக பல்வேறு அடக்குமுறைகளைக் கொண்டு வந்தனர். அதில் குறிப்பாக, ஆங்கிலேயர் மற்றும் இந்திய சிப்பாய்களுக்கு இடையில் ஊதிய வேறுபாடு, பன்றிக் கொழுப்புக்களை கொண்டு துப்பாக்கிகளை துடைக்க வேண்டும், மதக்குறிகளை நெற்றியில் இடக்கூடாது உள்ளிட்ட பல்வேறு அடக்குமுறைகளைக் கொண்டு வந்ததாக வரலாற்றுச் சான்றுகள் கூறுகின்றன.