சென்னை: தமிழக பாஜக தலைவர் அண்ணாமலை, தமிழிசை சௌந்தரராஜன் மற்றும் மூத்த நிர்வாகிகள் கிண்டியில் உள்ள ராஜ்பவனில் தமிழக ஆளுநர் ஆர்.என். ரவியை சந்தித்து இன்று காலை கோரிக்கை மனுவை கொடுத்தனர். அந்த புகார் மனுவில், “கடந்த ஆண்டு விழுப்புரம் மற்றும் செங்கல்பட்டு மாவட்டங்களில் கள்ளச்சாராயம் குடித்து 23 பேர் உயிரிழந்தனர். கடந்த ஆண்டு நடந்த சோகத்தின்போது, தமிழக பாஜக இந்த பிரச்னையை உறுதியாகக் கையில் எடுத்து கள்ளச்சாராயம் விநியோகிப்பவருக்கும் திமுக அமைச்சர் செஞ்சி மஸ்தானுக்கும் உள்ள தொடர்பை அம்பலப்படுத்தியது.
ஆனால், அமைச்சர் செஞ்சி மஸ்தானுக்கு எதிராக தமிழக அரசு எந்த நடவடிக்கையும் எடுக்கவில்லை. தமிழக அரசின் இந்த மெத்தனப் போக்குதான் இதுபோன்ற சம்பவங்கள் மீண்டும் மீண்டும் நடைபெறுவதற்கு முதன்மைக் காரணமாக அமைந்துள்ளது. கள்ளக்குறிச்சியில் கள்ளச்சாராயம் அருந்தி 55 பேர் பரிதாபமாக உயிரிழந்துள்ளனர். மேலும் 140க்கும் மேற்பட்டோர் கள்ளக்குறிச்சி, சேலம், விழுப்புரம் அரசு மருத்துவக் கல்லூரி மருத்துவமனைகளிலும், புதுச்சேரி ஜிப்மர் மருத்துவமனையிலும் சிகிச்சை பெற்று வருகின்றனர்.
அதிக இறப்புகளைக் கொண்ட கள்ளக்குறிச்சியில் உள்ள கருணாபுரம் பகுதி, தாழ்த்தப்பட்ட சாதி மற்றும் பழங்குடியின சமூகத்தின் பெரும்பான்மையான வாழ்விடமாகும். ஜூன் 19, 2024 அன்று, 3 இறப்புகள் பதிவாகியபோது, மாவட்ட ஆட்சியர், காவல்துறை கண்காணிப்பாளருடன், பத்திரிகையாளர் சந்திப்பு ஒன்றைக் கொடுத்தார். இது கள்ளச்சாராயத்தால் நிகழ்ந்த மரணங்கள் அல்ல. இவை வதந்திகள் என்று குறைமதிப்பிற்கு உட்படுத்தப்பட்டது.
இந்த செய்தியாளர் சந்திப்பின்போது கலெக்டருக்கு அருகில் ரிஷிவந்தியம் தொகுதி எம்.எல்.ஏ வசந்தம் கார்த்திகேயன் அமர்ந்திருந்தார். தமிழக அரசு காவல்துறை கண்காணிப்பாளரை சஸ்பெண்ட் செய்து, மாவட்ட ஆட்சியர் மாற்றப்பட்டார். ஆனால், இது கள்ளச்சாராயத்தால் ஏற்பட்ட மரணம் அல்ல என்று ஒதுக்கித் தள்ளுவதில் பங்கு வகித்த எம்.எல்.ஏ வசந்தம் கார்த்திகேயன் மீது எந்த நடவடிக்கையும் எடுக்கப்படவில்லை.
வசந்தம் கார்த்திகேயன் மட்டுமின்றி சங்கராபுரம் எம்.எல்.ஏ உதயசூரியனும் சட்டவிரோத மது விற்பனையில் ஈடுபடும் நபர்களை காக்கும் பணியில் ஈடுபட்டுள்ளார். கள்ளச்சாராயம் தயாரித்து விநியோகித்ததாக இதுவரை 6 பேரை காவல் துறை கைது செய்துள்ளது. கைது செய்யப்பட்டவர்களில் ஒருவரின் (கண்ணுக்குட்டி என்கிற கோவிந்தராஜன்) வீட்டுக்கு உள்ளேயும் வெளியேயும் திமுக ஸ்டிக்கர் ஒட்டப்பட்டிருந்த வீட்டை ஊடகங்கள் காட்டி, அவர் திமுகவின் தீவிர செயல்பாட்டாளராக இருக்கலாம் என்பதைக் குறிக்கிறது.