திருநெல்வேலி:திருநெல்வேலி மாவட்டம், மூன்றடைப்பு அடுத்த வாகை குளத்தைச் சேர்ந்தவர் தீபக் ராஜா(30). இவர் இன்று(மே 20) தனது காதலியுடன் பாளையங்கோட்டை அருகே கேடிசி நகரில் உள்ள பிரபல ஹோட்டலில் உணவருந்தச் சென்றுள்ளார்.
அப்போது அங்கு வந்த மர்ம கும்பல் ஒன்று ஹோட்டல் வாசலில் வைத்து தீபக் ராஜாவை அரிவாளால் சரமாரியாக தாக்கி உள்ளனர். இந்த தாக்குதலில், சம்பவ இடத்திலேயே தீபக் ராஜா உயிரிழந்தார். தனது கண்முன்னே காதலனை வெட்டி கொலை செய்ததைக் கண்டு தீபக் ராஜாவின் காதலி கதறி அழுதார்.
இது குறித்த தகவல் உடனடியாக பாளையங்கோட்டை போலீசாருக்கு தெரிவிக்கப்பட்டது. விரைந்து வந்த பாளையங்கோட்டை போலீசார் மற்றும் திருநெல்வேலி மாநகர காவல் துணை ஆணையர் ஆதர்ஷ் பச்சேரா உள்ளிட்ட அதிகாரிகள் தீபக் ராஜா உடலை மீட்டு பிரேத பரிசோதனைக்காக அரசு மருத்துவமனைக்கு அனுப்பி வைத்தனர். பின்னர், இந்த சம்பவம் குறித்து போலீசார் வழக்குப்பதிவு செய்து விசாரணை மேற்கொண்டனர்.
போலீசாரின் முதல்கட்ட விசாரணையில், தீபக் ராஜா மீது ஏற்கனவே கொலை வழக்குகள் உள்பட சில வழக்குகள் நிலுவையில் இருப்பதாகக் கூறப்படுகிறது. குறிப்பாக, சாதி ரீதியாக நடைபெற்ற பல்வேறு குற்றச் சம்பவங்களில் தீபக் ராஜாவுக்கு தொடர்பு இருப்பதாகவும் கூறப்படுகிறது.