சென்னை: நடிகை அனுஷ்காவின் பிறந்தநாளை முன்னிட்டு அவர் நடித்துள்ள ’காதி’ (Ghaati) படத்தின் போஸ்டர் வெளியாகியுள்ளது. இந்திய சினிமாவில் பெண்களை மையமாக கொண்டு தற்போது பல்வேறு படங்கள் வெளி வருகிறது. ஆனால் தனது திரை வாழ்வில் ஆரம்ப கட்டத்திலேயே பெண் கதாபாத்திரத்தை மையமாக கொண்ட படத்தில் நடித்து பெயர் பெற்றவர் அனுஷ்கா. இவர் நடித்த அருந்ததி திரைப்படம் தென் இந்திய அளவில் மாபெரும் வெற்றி பெற்றது.
மேலும் தெலுங்கு, தமிழ் சினிமாவில் முன்னணி நடிகையாக வலம் வருகிறார். இவர் ரஜினி, விஜய், விக்ரம், சிம்பு உள்ளிட்ட நடிகர்கள் உடன் ஜோடியாக நடித்து ரசிகர்களை கவர்ந்துள்ளார். தென்னிந்திய திரையுலக குயின் என அழைக்கப்படும் அனுஷ்கா நடிப்பில் தற்போது காதி என்ற படம் உருவாகி உள்ளது. கிரிஷ் இப்படத்தை இயக்கியுள்ளார்.
UV கிரியேஷன்ஸ் வழங்கும் இப்படத்தினை, ராஜீவ் ரெட்டி மற்றும் சாய் பாபு ஜகர்லமுடி ஆகியோர் இணைந்து தயாரிக்கின்றனர். வேதம் (தமிழில் வானம்) படத்தின் வெற்றியைத் தொடர்ந்து, அனுஷ்கா மற்றும் க்ரிஷ் மீண்டும் இணையும் திரைப்படம் இதுவாகும். அனுஷ்காவின் பிறந்தநாளைக் கொண்டாடும் வகையில் இப்படத்தின் ஃபர்ஸ்ட் லுக் மற்றும் கிளிம்ப்ஸ் வீடியோவை படக்குழு வெளியிட்டுள்ளனர்.
அதிரடி தோற்றத்தில் மிரட்டலான அனுஷ்காவை அறிமுகப்படுத்தும் இந்த போஸ்டரில், அனுஷ்கா தலை மற்றும் கைகளில் இருந்து ரத்தம் சொட்டக் காணப்படுகிறார், நெற்றியில் பொட்டு வைத்து பயங்கரமாக காட்சி அளிக்கிறார். மேலும் ஆக்ஷன் த்ரில்லராக உருவாகி உள்ள இப்படத்தின் கிளிம்ப்ஸ் வீடியோ தற்போது வெளியாகியுள்ளது.