சென்னை: பிக்பாஸ் சீசன் 8 தமிழ் நிகழ்ச்சி நேற்று (அக்.06) தொடங்கியது. இந்த சீசனை நடிகர் கமல்ஹாசனுக்கு பதில் விஜய் சேதுபதி தொகுத்து வழங்குகிறார். இந்த பிக்பாஸ் நிகழ்ச்சியில் தயாரிப்பாளர் ரவீந்திரன், சாச்சனா, தர்ஷா குப்தா, தீபக், அன்ஷிதா, ஆர்னவ், முத்துக்குமரன் உள்ளிட்ட 18 போட்டியாளர்கள் கலந்து கொண்டுள்ளனர்.
விஜய் சேதுபதி முதல் நாள் நிகழ்ச்சியை தொகுத்து வழங்கிய விதத்தை நெட்டிசன்கள் சமூக வலைதளத்தில் பாராட்டி வருகின்றனர். மேலும் போட்டியாளர்களை அதிர்ச்சிக்குள்ளாக்கும் வகையில் விஜய் சேதுபதி ஒரு அறிவிப்பை வெளியிட்டார். பிக்பாஸ் நிகழ்ச்சி தொடங்கி 24 மணி நேரத்தில் முதல் எலிமினேஷன் என தெரிவித்தார்.
இன்று முதல் எலிமினேஷன் மகாராஜா பட நடிகை சாச்சனா வெளியேற வாய்ப்புள்ளதாக தெரிகிறது. இது ஒரு புறம் இருக்க, இந்தி பிக்பாஸ் ஹிந்தி சீசன் 18 நேற்று தொடங்கியுள்ளது. கடந்த 17 சீசனாக பிக்பாஸ் சீசனை தொகுத்து வழங்கி வந்த நடிகர் சல்மான் கான் இம்முறையும் 18வது சீசனாக தொகுத்து வழங்குகிறார். இதில் தமிழ் நடிகையும், குக் வித் கோமாளி நிகழ்ச்சி போட்டியாளருமான ஸ்ருதிகா போட்டியாளராக பங்கேற்றுள்ளார்.