ਗੁਰਦਾਸਪੁਰ: ਸੂਬੇ ਵਿੱਚ ਵਿਆਹਾਂ-ਸ਼ਾਦੀਆਂ ਅਤੇ ਸਮਾਗਮਾਂ ਅੰਦਰ ਹਥਿਆਰ ਲੈ ਕੇ ਜਾਣ ਦੀ ਮਨਾਹੀ ਦੇ ਬਾਵਜੂਦ ਇਹ ਸਿਲਸਿਲਾ ਜਿਉਂ ਦਾ ਤਿਉਂ ਜਾਰੀ ਹੈ। ਕਈ ਵਾਰੀ ਹਥਿਆਰਾਂ ਨੇ ਇਨ੍ਹਾਂ ਖ਼ੁਸ਼ੀ ਦੇ ਪਲਾਂ ਨੂੰ ਗਮਾਂ ਵਿੱਚ ਵੀ ਬਦਲ ਦਿੱਤਾ ਹੈ ਪਰ ਫਿਰ ਵੀ ਲੋਕ ਫੁਕਰਪੁਣੇ ਵਿੱਚ ਪਿੱਛੇ ਨਹੀਂ ਹਟਣਾ ਚਾਹੁੰਦੇ।
ਅਜਿਹਾ ਹੀ ਮਾਮਲਾ ਦੇਰ ਰਾਤ ਜਲੰਧਰ-ਅੰਮ੍ਰਿਤਸਰ ਬਾਈਪਾਸ ਰੋਡ 'ਤੇ ਸਥਿਤ ਇੱਕ ਵਿਕਟੋਰੀਆ ਰੈਸਟੋਰੈਂਟ ਅਤੇ ਬੈਕੁੰਟ ਹਾਲ ਵਿੱਚ ਵਾਪਰਿਆ ਹੈ, ਜਿਥੇ ਇੱਕ ਵਿਆਹ ਪਾਰਟੀ ਦੌਰਾਨ ਗੋਲੀ ਚੱਲਣ ਕਾਰਨ ਲਾੜਾ ਜ਼ਖ਼ਮੀ ਹੋ ਗਿਆ।
ਜਾਣਕਾਰੀ ਅਨੁਸਾਰ ਰੈਸਟੋਰੈਂਟ ਵਿੱਚ ਕਿਸੇ ਨਵ-ਵਿਆਹੇ ਜੋੜੇ ਦੀ ਮੰਗਣੀ ਦੀ ਪਾਰਟੀ ਚੱਲ ਰਹੀ ਸੀ। ਵਿਆਹ ਪਾਰਟੀ ਵਿੱਚ ਲਾੜੇ ਦੇ ਦੋਸਤ, ਜਿਹੜੇ ਕਿ ਹਥਿਆਰ ਲੈ ਕੇ ਪੁੱਜੇ ਸਨ, ਨੇ ਹਵਾਈ ਫ਼ਾਇਰ ਕਰਨੇ ਸ਼ੁਰੂ ਕਰ ਦਿੱਤੇ। ਇਸ ਦੌਰਾਨ ਇੱਕ ਹਵਾਈ ਫ਼ਾਇਰ ਗ਼ਲਤ ਦਿਸ਼ਾ ਵੱਲ ਹੋ ਗਿਆ ਅਤੇ ਲਾੜੇ ਦੇ ਪੈਰ ਵਿੱਚ ਜਾ ਵੱਜਿਆ। ਜ਼ਖ਼ਮੀ ਹੋਏ ਲਾੜੇ ਨੂੰ ਰਿਸ਼ਤੇਦਾਰਾਂ ਨੇ ਗੱਡੀ ਵਿੱਚ ਬਿਠਾ ਕੇ ਬਟਾਲਾ ਦੇ ਸਿਵਲ ਹਸਪਤਾਲ ਪਹੁੰਚਾਇਆ। ਕੁੱਝ ਦੇਰ ਬਾਅਦ ਇਲਾਜ ਪਿੱਛੋਂ ਲਾੜੇ ਨੂੰ ਦੁਬਾਰਾ ਰੈਸਟੋਰੈਂਟ ਲਿਆ ਕੇ ਸ਼ਗਨ ਪੂਰੇ ਕੀਤੇ ਗਏ।
ਉਧਰ, ਗੋਲੀ ਚੱਲਣ ਦੀ ਸੂਚਨਾ ਮਿਲਣ 'ਤੇ ਪੁਲਿਸ ਵੀ ਮੌਕੇ 'ਤੇ ਪੁੱਜ ਗਈ ਅਤੇ ਜਾਂਚ ਅਰੰਭ ਦਿੱਤੀ। ਐਸਐਚਓ ਅਮੋਲਕ ਸਿੰਘ ਨੇ ਕਿਹਾ ਇਸ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ।