ਬਰਨਾਲਾ: ਰੇਲਵੇ ਲਾਈਨਾਂ, ਪਲੇਟਫਾਰਮਾਂ ਤੋਂ ਹੁੰਦਾ ਬਰਨਾਲਾ ਧਰਨਾ ਹੁਣ ਰੇਲਵੇ ਪਾਰਕਿੰਗ ਵਾਲੀ ਥਾਂ 'ਤੇ ਲਗਾਤਾਰ ਪੂਰੇ ਉਤਸ਼ਾਹ ਤੇ ਜੋਸ਼ ਨਾਲ ਚੱਲ ਰਿਹਾ ਹੈ। ਧਰਨਾ ਹੁਣ ਰੇਲਵੇ ਸਟੇਸ਼ਨ ਦਾ ਪੱਕਾ ਫੀਚਰ ਪ੍ਰਤੀਤ ਹੋਣ ਲੱਗ ਪਿਆ ਹੈ। ਧਰਨਾਕਾਰੀਆਂ ਲਈ ਹੁਣ ਦਿਨਾਂ ਦੀ ਗਿਣਤੀ ਕੋਈ ਮਾਅਨੇ ਨਹੀਂ ਰੱਖਦੀ ਬਸ ਖੇਤੀ ਕਾਨੂੰਨ ਰੱਦ ਕਰਵਾਉਣ ਦਾ ਟੀਚਾ ਹੀ ਮਾਇਨੇ ਰੱਖਦਾ ਹੈ।
ਇਕ ਸਾਲ ਦੇ ਦੌਰਾਨ ਧਰਨੇ ਨੇ ਸਾਰੀਆਂ ਮੌਸਮੀ ਕਰੋਪੀਆਂ ਤਾਂ ਝੱਲੀਆਂ ਹੀ, ਸਾਰੇ ਤਿਉਹਾਰ ਤੇ ਇਤਿਹਾਸਕ ਦਿਹਾੜੇ ਵੀ ਮਨਾਏ।
ਸਾਲ ਦੌਰਾਨ ਆਏ ਜਨਮ ਤੇ ਸ਼ਹੀਦੀ ਦਿਹਾੜਿਆਂ 'ਤੇ ਗੁਰੂਆਂ, ਪੀਰਾਂ, ਸ਼ਹੀਦਾਂ, ਆਜਾਦੀ ਘੁਲਾਟੀਆਂ ਤੇ ਹੋਰ ਇਤਿਹਾਸਕ ਹਸਤੀਆਂ ਨੂੰ ਸਿਜਦੇ ਕੀਤੇ ਗਏ ਅਤੇ ਸ਼ਰਧਾਜਲੀਆਂ ਭੇਟ ਕੀਤੀਆਂ ਗਈਆਂ। ਇਸ ਤਰ੍ਹਾਂ ਖੇਤੀ ਕਾਨੂੰਨ ਰੱਦ ਕਰਵਾਉਣ ਦੇ ਆਪਣੇ ਮੁੱਖ ਮਕਸਦ ਦੇ ਨਾਲ ਨਾਲ ਧਰਨਾ ਇਤਿਹਾਸ ਦਾ ਇੱਕ ਅਮਲੀ ਸਕੂਲ ਵੀ ਹੋ ਨਿਬੜਿਆ।
ਆਗੂਆਂ ਨੇ ਕਿਹਾ ਕਿ ਘੱਟ ਸਮੇਂ ਵਿੱਚ ਪੱਕਣ ਵਾਲੀਆਂ ਕਿਸਮਾਂ ਦਾ ਝੋਨਾ ਮੰਡੀਆਂ ਵਿੱਚ ਆਉਣਾ ਸ਼ੁਰੂ ਹੋ ਚੁੱਕਾ ਹੈ। ਕਿਸਾਨ ਹੋਰ ਦਸ ਦਿਨ ਲਈ ਮੰਡੀਆਂ ਵਿੱਚ ਰੁਲਣ ਲਈ ਮਜ਼ਬੂਰ ਹੋਣਗੇ। ਦਰਅਸਲ ਇਹ ਫਰਮਾਨ ਫਰਦਾਂ ਮੰਗਣ, ਨਮੀਂ, ਬਦਰੰਗ/ ਟੋਟੇ ਆਦਿ ਦੇ ਸਖ਼ਤ ਮਾਪਦੰਡ ਤੈਅ ਕਰਨ ਵਾਲੇ ਕਦਮਾਂ ਦੀ ਹੀ ਅਗਲੀ ਕੜੀ ਹੈ। ਇਸ ਸਰਕਾਰੀ ਖਰੀਦ ਖਤਮ ਕਰਨ ਵੱਲ ਵਧਦੇ ਕਦਮਾਂ ਦੀ ਆਹਟ ਹੈ ਜੋ ਹੁਣ ਸਾਫ ਸੁਣਾਈ ਦੇਣ ਲੱਗੀ ਹੈ। ਸਰਕਾਰ ਇਹ ਫਰਮਾਨ ਵਾਪਸ ਲਵੇ ਅਤੇ ਖਰੀਦ ਤੁਰੰਤ ਸ਼ੁਰੂ ਕਰੇ।
