ਅੰਮ੍ਰਿਤਸਰ: ਵਿਆਹ ਨੂੰ ਲੈ ਕੇ ਹਰ ਇਨਸਾਨ ਦੇ ਆਪਣੇ ਆਪਣੇ ਸੁਪਨੇ ਹੁੰਦੇ ਹਨ। ਉਥੇ ਹੀ ਵਿਆਹ ਦੀਆਂ ਸਭ ਤੋਂ ਮੁੱਖ ਰਸਮਾਂ ਵਿੱਚੋਂ ਇੱਕ ਚੂੜਾ ਚੜਾਉਣ ਦੀ ਰਸਮ ਹੁੰਦੀ ਹੈ। ਚਾਹੇ ਕੋਈ ਆਮ ਇਨਸਾਨ ਹੋਵੇ ਜਾਂ ਫਿਰ ਬਾਲੀਵੁੱਡ ਹਸਤੀ...ਹਰ ਥਾਂ ਉਤੇ ਚੂੜੇ ਨੂੰ ਮੁੱਖ ਮੰਨਿਆ ਜਾਂਦਾ ਹੈ। ਇਸੇ ਤਰ੍ਹਾਂ ਹੀ ਗੁਰੂ ਨਗਰੀ ਅੰਮ੍ਰਿਤਸਰ ਵਿੱਚ ਗੁਰਚਰਨ ਸਿੰਘ ਚੰਨਾ ਚੂੜੇ ਵਾਲਾ ਨਾਲ ਮਸ਼ਹੂਰ ਹਨ, ਜਿੰਨ੍ਹਾਂ ਦੇ ਚੂੜੇ ਦੀ ਚਮਕ ਬਾਲੀਵੁੱਡ ਤੋਂ ਲੈ ਕੇ ਵਿਦੇਸ਼ਾਂ ਤੱਕ ਹੈ।
ਅੰਮ੍ਰਿਤਸਰ ਦੇ ਲੋਕਾਂ ਤੋਂ ਇਲਾਵਾ ਵੱਡੀਆਂ ਫਿਲਮਾਂ ਦੀਆਂ ਅਦਾਕਾਰਾਂ ਨੇ ਵੀ ਆਪਣੇ ਵਿਆਹ 'ਚ ਚੰਨਾ ਦੇ ਹੱਥਾਂ ਦਾ ਚੂੜਾ ਪਾਇਆ ਹੈ। ਜਿੰਨ੍ਹਾਂ ਵਿੱਚੋਂ ਮਾਧੁਰੀ ਦੀਕਸ਼ਿਤ, ਐਸ਼ਵਰਿਆ ਰਾਏ, ਈਸ਼ਾ ਦਿਓਲ ਤੋਂ ਲੈ ਕੇ ਭਾਰਤੀ ਸਿੰਘ ਵੀ ਸ਼ਾਮਿਲ ਹਨ। ਇੰਨਾ ਹੀ ਨਹੀਂ ਮਸ਼ਹੂਰ ਫਿਲਮ 'ਗਦਰ-ਏਕ ਪ੍ਰੇਮ ਕਥਾ' ਦੀ ਅਦਾਕਾਰਾ ਅਮੀਸ਼ਾ ਪਟੇਲ ਨੇ ਜਿਹੜਾ ਚੂੜਾ ਫਿਲਮ ਵਿੱਚ ਪਾਇਆ ਸੀ, ਉਹ ਵੀ ਚੰਨਾ ਚੂੜੇ ਵਾਲਾ ਨੇ ਹੀ ਬਣਾਇਆ ਸੀ। ਚੰਨਾ ਦਾ ਨਾਮ ਗੁਰਚਰਨ ਸਿੰਘ ਚੰਨਾ ਹੈ, ਪਰ ਦੁਨੀਆ ਉਹਨਾਂ ਨੂੰ ਚੰਨਾ ਚੂੜੇ ਵਾਲਾ ਦੇ ਨਾਂਅ ਨਾਲ ਜਾਣਦੀ ਹੈ।
ਇਹ ਮਸ਼ਹੂਰ ਹਸਤੀਆਂ ਪਾ ਚੁੱਕੀਆਂ ਨੇ ਚੰਨਾ ਚੂੜੇ ਵਾਲਾ ਦਾ ਚੂੜਾ
ਹੁਣ ਸਾਡੀ ਟੀਮ ਨੇ ਗੁਰਚਰਨ ਸਿੰਘ ਚੰਨਾ ਚੂੜੇ ਵਾਲਾ ਨਾਲ ਖਾਸ ਗੱਲਬਾਤ ਕੀਤੀ, ਇਸ ਦੌਰਾਨ ਉਨ੍ਹਾਂ ਨੇ ਦੱਸਿਆ ਕਿ ਉਸ ਨੂੰ ਉਸ ਵੇਲੇ ਖੁਸ਼ੀ ਹੁੰਦੀ ਹੈ, ਜਦੋਂ ਉਹ ਕਿਸੇ ਫਿਲਮ ਦੇ ਵਿੱਚ ਆਪਣਾ ਬਣਾਇਆ ਹੋਇਆ ਚੂੜਾ ਦੇਖਦਾ ਹੈ ਜਾਂ ਫਿਰ ਕਿਸੇ ਬਾਲੀਵੁੱਡ ਅਦਾਕਾਰਾ ਦੇ ਹੱਥ 'ਚ ਉਨ੍ਹਾਂ ਦਾ ਚੂੜਾ ਵੇਖਣ ਨੂੰ ਮਿਲਦਾ ਹੈ।