ਚੰਡੀਗੜ੍ਹ: ਪੰਜਾਬੀ ਲਘੂ ਫਿਲਮਾਂ ਨੂੰ ਨਵੇਂ ਅਯਾਮ ਦੇਣ ਅਤੇ ਮਿਆਰੀ ਕੰਟੈਂਟ ਨੂੰ ਉਭਾਰ ਦੇਣ ਵਿੱਚ ਲਗਾਤਾਰ ਅਹਿਮ ਭੂਮਿਕਾ ਨਿਭਾ ਰਹੇ ਹਨ ਨਿਰਦੇਸ਼ਕ ਭਗਵੰਤ ਸਿੰਘ ਕੰਗ, ਜੋ ਅਪਣੀ ਨਵੀਂ ਪੰਜਾਬੀ ਲਘੂ ਫਿਲਮ 'ਨੰਗੇਜ' ਲੈ ਕੇ ਦਰਸ਼ਕਾਂ ਦੇ ਸਨਮੁੱਖ ਹੋਏ ਹਨ, ਜਿੰਨ੍ਹਾਂ ਦੀ ਸੋਸ਼ਲ ਮੀਡੀਆ ਪਲੇਟਫ਼ਾਰਮ ਉਪਰ ਰਿਲੀਜ਼ ਹੋ ਚੁੱਕੀ ਇਸ ਫਿਲਮ ਨੂੰ ਚਾਰੇ-ਪਾਸੇ ਤੋਂ ਭਰਵਾਂ ਹੁੰਗਾਰਾ ਮਿਲ ਰਿਹਾ ਹੈ।
'ਫਿਲਮੀ ਅੱਡਾ' ਵੱਲੋਂ ਪੇਸ਼ ਕੀਤੀ ਗਈ ਇਸ ਫਿਲਮ ਦੇ ਨਿਰਮਾਤਾ ਭਗਵੰਤ ਸਿੰਘ ਕੰਗ ਅਤੇ ਪਰਮਜੀਤ ਸਿੰਘ ਨਾਗਰਾ, ਸਹਿ ਨਿਰਮਾਤਾ ਲਖਵਿੰਦਰ ਸਿੰਘ ਜਟਾਣਾ, ਡੀਓਪੀ ਜਸਜੋਤ ਗਿੱਲ ਹਨ, ਜਦਕਿ ਨਿਰਦੇਸ਼ਨ ਕਮਾਂਡ ਭਗਵੰਤ ਸਿੰਘ ਕੰਗ ਵੱਲੋਂ ਸੰਭਾਲੀ ਗਈ ਹੈ।
ਪੰਜਾਬੀ ਸਾਹਿਤ ਵਿੱਚ ਮਾਣ ਭਰੀ ਪਹਿਚਾਣ ਰੱਖਦੇ ਕਹਾਣੀਕਾਰ ਜਤਿੰਦਰ ਹਾਂਸ ਦੀ ਕਹਾਣੀ ਅਧਾਰਿਤ ਇਸ ਫਿਲਮ ਵਿੱਚ ਸਮਾਜ ਦੀਆਂ ਕਈ ਤਲਖ਼ ਸੱਚਾਈਆਂ ਨੂੰ ਉਜਾਗਰ ਕਰਦੀ ਇਸ ਲਘੂ ਫਿਲਮ ਦੀ ਸਟਾਰ-ਕਾਸਟ ਦੀ ਗੱਲ ਕਰੀਏ ਤਾਂ ਇਸ ਵਿੱਚ ਜਤਿੰਦਰ ਹਾਂਸ, ਜੈਸਮੀਨ, ਜਸ ਬੋਪਾਰਾਏ, ਹਰਜੀਤ ਜੱਸਲ, ਬਲਜੀਤ ਮਹਿਤੋ, ਸੋਨੂੰ ਕਾਹਲੋ, ਲਫਜ਼ ਧਾਲੀਵਾਲ, ਵੱਡਾ ਸਰਾਓ, ਕੁਲਦੀਪ ਸੰਧੂ, ਅਰਸ਼ਦ ਗੋਰੀਆ, ਸ਼ਮਸ਼ੇਰ ਗਿੱਲ, ਰਾਜ ਮਲਹੋਤਰਾ, ਨਿੱਕੀ, ਅਨੀਤਾ ਆਦਿ ਸ਼ੁਮਾਰ ਹਨ।