ਅਸਾਮ/ਗੁਹਾਟੀ: ਅਸਾਮ ਦੇ ਤਿੰਨ ਸ਼ਰਧਾਲੂਆਂ ਦੀ ਮੱਕਾ ਵਿੱਚ ਪਵਿੱਤਰ ਹੱਜ ਯਾਤਰਾ ਦੌਰਾਨ ਮੌਤ ਹੋ ਗਈ। ਇਹ ਦਰਦਨਾਕ ਘਟਨਾ ਐਤਵਾਰ ਨੂੰ ਮੱਕਾ ਦੇ ਮੀਨਾ 'ਚ ਜਮਰਾਤ 'ਚ ਪੱਥਰਬਾਜ਼ੀ ਦੌਰਾਨ ਵਾਪਰੀ। ਇਕੱਠੀ ਹੋਈ ਭਾਰੀ ਭੀੜ ਕਾਰਨ ਮਚੀ ਭਗਦੜ ਵਿੱਚ ਉਹ ਕੁਚਲੇ ਗਏ।
ਮ੍ਰਿਤਕਾਂ ਦੀ ਪਛਾਣ ਕਛਰ ਜ਼ਿਲੇ ਦੇ ਬੋਰਖੋਲਾ ਦੇ ਮੌਲਾਨਾ ਸੈਫੂਦੀਨ ਬਾਰਭੁਈਆ, ਹੇਲਾਕਾਂਡੀ ਜ਼ਿਲੇ ਦੇ ਚਾਂਦਪੁਰ ਪਿੰਡ ਦੀ ਸਾਲੇਹਾ ਬੇਗਮ ਬਾਰਭੁਈਆ ਅਤੇ ਬਾਰਪੇਟਾ ਜ਼ਿਲੇ ਦੀ ਜ਼ਰੀਨਾ ਬੇਗਮ ਵਜੋਂ ਹੋਈ ਹੈ। ਸਾਊਦੀ ਅਧਿਕਾਰੀਆਂ ਨੇ ਉਨ੍ਹਾਂ ਦੀਆਂ ਲਾਸ਼ਾਂ ਨੂੰ ਸਥਾਨਕ ਹਸਪਤਾਲ ਦੇ ਮੁਰਦਾਘਰ ਵਿੱਚ ਰੱਖਿਆ ਹੈ। ਇਸ ਤੋਂ ਪਹਿਲਾਂ, ਹਾਲ ਹੀ ਵਿੱਚ ਕਛਰ ਜ਼ਿਲ੍ਹੇ ਦੇ ਤੋਪਖਾਨਾ ਦੇ ਇੱਕ ਹੋਰ ਅਸਾਮੀ ਸ਼ਰਧਾਲੂ ਜਸੀਰੂਦੀਨ ਮਜੂਮਦਾਰ ਦੀ ਵੀ ਹੱਜ ਕਰਦੇ ਸਮੇਂ ਮੱਕਾ ਵਿੱਚ ਮੌਤ ਹੋ ਗਈ ਸੀ।