ସାମ୍ବାଦିକ ସମ୍ମିଳନୀ କଲେ ମନୋଜ ମିଶ୍ର ରାଉରକେଲା: ଓଡ଼ିଆ ସିନେ ଦର୍ଶକଙ୍କ ପାଇଁ ବର୍ତ୍ତମାନ ଦଶହରା ଭେଟି ନେଇ ଆସିଛି ‘ମାଇଣ୍ଡ ଗେମ୍’ ଫିଲ୍ମ । ବହୁଚର୍ଚ୍ଚିତ ଓଡ଼ିଆ ଓ ସମ୍ବଲପୁରୀ ଚଳଚ୍ଚିତ୍ର ‘ମାଇଣ୍ଡ ଗେମ୍’ ଗତ 6 ତାରିଖରୁ ସମସ୍ତ ପ୍ରେକ୍ଷାଳୟରେ ରିଲିଜ ହୋଇସାରିଛି । ଏହି ଚଳଚ୍ଚିତ୍ର ଓଡିଶାବାସୀଙ୍କୁ ଖୁବ୍ ଆକର୍ଷିତ କରୁଛି । ତେବେ ଏହି ପରିପ୍ରେକ୍ଷୀରେ ରାଉରକେଲାକୁ ଆସିଛନ୍ତି ‘ମାଇଣ୍ଡ ଗେମ୍’ର ମୁଖ୍ୟ ଚରିତ୍ରରେ ଅଭିନୟ କରୁଥିବା ମନୋଜ ମିଶ୍ର । ଅଭିନେତା ମନୋଜ ମିଶ୍ର ଏନେଇ ଏକ ସାମ୍ବାଦିକ ସମ୍ମିଳନୀର ଆୟୋଜନ କରିି ଫିଲ୍ମ ସମ୍ପର୍କରେ କହିଛନ୍ତି । ଫିଲ୍ମ କିଭଳି ପ୍ରସ୍ତୁତି ହୋଇଥିଲା ଏବଂ ଫିଲ୍ମ ତିଆରି କରିବା ପଛର କାହାଣୀ ସମ୍ପର୍କରେ ଆଲୋଚନା କରିଛନ୍ତି।
ଗତ 5 ବର୍ଷ ପୂର୍ବେ ଘଟିଥିବା ବହୁ ଚର୍ଚ୍ଚିତ ବଲାଙ୍ଗିର ଜିଲ୍ଲାର ପାଟଣାଗଡ଼ ପାର୍ସଲ ବୋମା ବିସ୍ଫୋରଣ ଘଟଣାର ପୋଲିସ ଯାଞ୍ଚ ସମ୍ପର୍କୀତ ସତ୍ୟ ଘଟଣା ଉପରେ ଆଧାରିତ ନିଚ୍ଛକ ଓଡ଼ିଆ କାହାଣୀ ଉପରେ ଆଧାରିତ ‘ମାଇଣ୍ଡ୍ ଗ୍ୟାମ୍’ । ବିଶେଷଭାବେ ଏହି ଚଳଚ୍ଚିତ୍ରଟିର ସମସ୍ତ ବିଭାଗରେ ଜାତୀୟ ଓ ଅନ୍ତର୍ଜାତୀୟ ସ୍ତରର କାର୍ଯ୍ୟ କରାଯାଇଥିବା ଯୋଗୁଁ ମାଇଣ୍ଡ ଗେମ୍କୁ ଦର୍ଶକମାନେ ଅଧିକରୁ ଅଧିକ ପସନ୍ଦ କରିବେ ବୋଲି ମନୋଜ କହିଛନ୍ତି । ଅନ୍ୟପକ୍ଷରେ ଏହି ଚଳଚ୍ଚିତ୍ରରେ ଅତୁଲ କୁଲକର୍ଣ୍ଣିଙ୍କ ସମେତ ଅନେକ ପ୍ରଖ୍ୟାତ ଓ ବିଶିଷ୍ଟ କଳାକାରଙ୍କ ଅଭିନୟ ଦମ୍ଦାର ହୋଇଛି ବୋଲି ମନୋଜ ମିଶ୍ର କହିଛନ୍ତି । ଏବଂ ଫିଲ୍ମକୁ ସମସ୍ତେ ଦେଖନ୍ତୁ ଏବଂ ଅଧିକରୁ ଅଧିକ ଭଲ ପାଇବା ଦିଅନ୍ତୁ ବୋଲି ସେ କହିଛନ୍ତି ।
ଏହା ମଧ୍ୟ ପଢନ୍ତୁ: Mind Game: ଅଙ୍ଗେ ନିଭାଇଥିବା ଘଟଣାକୁ ପରଦାରେ ଦେଖିଲେ ପାଟଣାଗଡ଼ ପୀଡିତ ପରିବାର
ବର୍ତ୍ତମାନ ଓଡ଼ିଆ ଫିଲ୍ମ ଏକ ନୂଆ ଢଙ୍ଗରେ ପ୍ରସ୍ତୁତ ହେବା ଆରମ୍ଭ ହେଲାଣି । ଏବଂ ଏହି ଫିଲ୍ମ ପ୍ରାୟ ଏକ ନୂଆ ଢଙ୍ଗରେ ଅଧିକ କିଛି ପ୍ରୟୋଗ ନକରି କିଭଳି ସାଧାରଣ ଢଙ୍ଗରେ ଫିଲ୍ମ ତିଆରି ହୋଇପରିବ ତାହା ନେଇ ବେଶ ଦୃଷ୍ଟି ଦିଆଯାଇଥିଲା । ତେବେ ଏହି ଫିଲ୍ମ ସୁଟିଂ ପରେ ଫିଲ୍ମ ଉପରେ କେସ ହୋଇଥିବାରୁ ପ୍ରାୟ ଚାରି ବର୍ଷ ଅଟକି ରହିଥିଲା । ତେବେ ଏହି ଫିଲ୍ମ ଦେଖିଲେ ଚାରି ବର୍ଷ ତଳର ଫିଲ୍ମ ଭଳି ଲାଗିବ ନାହିଁ ବୋଲି କହିଛନ୍ତି ମନୋଜ ମିଶ୍ର । ତେବେ ଫିଲ୍ମର ଷ୍ଟାର ଅଭିନେତା ଅତୁଳ କୂଳକରଣୀ ତାଙ୍କର କ୍ଲାସିକ ଆକ୍ଟିଂଗ ମାଧ୍ୟମରେ ଫିଲ୍ମକୁ ଆହୁରି ରୋଚକ କରିଛନ୍ତି ।
ମନୋଜ ମିଶ୍ର କହିଛନ୍ତି, "ଓଡିଶାକୁ ଭଲ କଣ୍ଟେଣ୍ଟ ଆସିବାକୁ ନେଇ ବର୍ତ୍ତମାନ ଯାଏ ଫିଲ୍ମ ଇଣ୍ଡଷ୍ଟ୍ରି ପ୍ରସ୍ତୁତ ହୋଇନାହିଁ । ଓଡ଼ିଶାରେ ମଧ୍ୟ ବହୁ ପ୍ରକାର ଘଟଣା ଏବଂ ପରମ୍ପରା ଓ ଲୋକକଥା ରହିଛି ଯାହାକୁ ନେଇ ଫିଲ୍ମ ତିଆରି କରାଯାଇ ପାରିବ । ଆମ ଓଡିଶାରେ ହିଁ ବହୁ ପ୍ରକାର ତଥ୍ୟ ରହିଛି ଯାହାକୁ ନେଇ ନୂଆ କଣ୍ଟେଣ୍ଟ୍ ମଧ୍ୟ ଲୋକଙ୍କ ମଧ୍ୟକୁ ଆସିବା ସହ ଓଡ଼ିଶା ଫିଲ୍ମ ଇଣ୍ଡଷ୍ଟ୍ରିର ନୂଆ ରୂପ ସାରା ଦେଶରେ ଦେଖିବାକୁ ମିଳିବ । ତେବେ ଓଡ଼ିଶାର ନିଜସ୍ୱ ଫିଲ୍ମ ନିର୍ମାଣ କଲେ ଫିଲ୍ମ ପ୍ରଡ୍ୟୁସର ଏବଂ ଡ଼ାଇରେକ୍ଟର ସହ ସମ୍ପୂର୍ଣ୍ଣ ଟିମ୍ ଭୟ କରୁଛନ୍ତି ଯେ ଫିଲ୍ମ ଚାଲିବ ନା ନାହିଁ ଲୋକଙ୍କୁ ପସନ୍ଦ ଆସିବ ନା ନାହିଁ । ତେବେ ସେ ଭୟକୁ ଦୂର କରି ନୂଆ କିଛି ଷ୍ଟେପ୍ ଫିଲ୍ମ ଇଣ୍ଡଷ୍ଟ୍ରି ଉଠାଇବା କଥା । ଯାହା ଦ୍ୱାରା ଓଡ଼ିଶାର ଫିଲ୍ମ ଇଣ୍ଡଷ୍ଟ୍ରି ଏକ ନୂଆ ରୂପ ଏବଂ ନୂଆ ରଙ୍ଗରେ ଆସି ପାରିବ । ଖାସ୍ କରି ଅଧିକ କ୍ରିଏଟିଭ ନକରି ସତ୍ୟତା ଦେଖାଇବାକୁ ଚେଷ୍ଟା କଲେ ହିଁ ବର୍ତ୍ତମାନ ପିଢି ଏହାକୁ ଗ୍ରହଣ କରିବେ ।"
ଇଟିଭି ଭାରତ, ରାଉରକେଲା
