ରାଉରକେଲା:ସତରେ ଦଇବ କେଡେ ନିଷ୍ଠୁର । ପରିବାର ପ୍ରତିପୋଷଣ ପାଇଁ ୧୭ ବର୍ଷ ବୟସରେ ମୂଲ ଲାଗିଥିଲେ ନାବାଳିକା । ଫ୍ୟାକ୍ଟ୍ରିରେ କାମ କରୁ କରୁ ମେସିନରେ ହାତ କଟିଗଲା । ଝିଅର ଏପରି ଦୁର୍ଦ୍ଦଶା ସହିନପାରି ଚିନ୍ତାରେ ମାଆ ଆରପାରିକୁ ଚାଲିଗଲେ । ହେଲେ ସବୁଠୁ ବିଡମ୍ବନାର ବିଷୟ ଯେ, କୋର୍ଟଙ୍କ ରାୟ ପରେ ମଧ୍ୟ ଆଜି ଯାଏଁ ପୀଡିତାଙ୍କୁ ମିଳିପାରି ନାହିଁ କ୍ଷତିପୂରଣ । ବର୍ଷ ବର୍ଷ ହେଲାଣି ନ୍ୟାୟ ଅପେକ୍ଷାରେ ଥିବା ପୀଡିତା ଏବେ ନ୍ୟାୟ ବ୍ୟବସ୍ଥା ଉପରୁ ଆସ୍ଥା ହରାଇଲେଣି । ଆଦିବାସୀ ଅଧ୍ୟୁଷିତ ସୁନ୍ଦରଗଡ଼ ଜିଲ୍ଲାର ରାଜଗାଙ୍ଗପୁର ଥାନା ଅନ୍ତର୍ଗତ ପାଣ୍ଡରାଟୋଲି ଗ୍ରାମରୁ ସାମ୍ନାକୁ ଆସିଛି ଏହି ଦୁଃଖଦ ଘଟଣା । ଏଠାରେ ଆଶ୍ରିତା ଲାକ୍ରା ନାମକ ଜଣେ ଆଦିବାସୀ ଯୁବତୀ ଦୁର୍ଘଟଣାରେ ହାତ ହରାଇବା ପରେ ଦାରିଦ୍ର୍ୟର ତାଡନା ଭିତରେ ଦୁର୍ବିସହ ଜୀବନ ବିତାଉଛନ୍ତି ।
ପ୍ରତିଶୃତି ପାଲଟିଲା ପାଣିର ଗାର
ଆଶ୍ରିତାଙ୍କ ବାପା ଦିନ ମଜୁରୀଆ । ପରିବାରର ଆର୍ଥିକ ଅସ୍ବଚ୍ଛଳତା ଯୋଗୁଁ ୨୦୦୮ ମସିହାରେ ବିଲେଇମୁଣ୍ଡାରେ ଥିବା ରାଧାକୃଷ୍ଣ ରାଇସ୍ ମିଲରେ ଏହି ଯୁବତୀ ଶ୍ରମିକ ଭାବେ କାମ କରୁଥିଲେ । ଦିନେ କାମ କରୁଥିବା ସମୟରେ କନଭେୟର ବେଲ୍ଟ ରୋଲର ମଧ୍ୟରେ ତାଙ୍କର ଡାହାଣ ହାତ ଫସିଗଲା । ଫଳରେ ହାତଟି କହୁଣୀ ତଳୁ ସମ୍ପୂର୍ଣ୍ଣ କଟିଗଲା । ଝିଅର ଏଭଳି ଅବସ୍ଥା ସହିନପାରି ଚିନ୍ତାରେ ମାଆ ଆରପାରିକୁ ଚାଲିଗଲେ । ଦୁର୍ଘଟଣା ପରେ ରାଇସ ମିଲ ଫ୍ୟାକ୍ଟ୍ରି ମାଲିକ କ୍ଷତିପୂରଣ ପ୍ରଦାନ ପାଇଁ ପ୍ରତିଶ୍ରୁତି ଦେଇଥିଲେ । ହେଲେ ଆଶ୍ରିତା ଦିବ୍ୟାଙ୍ଗ ହୋଇ ବର୍ଷ ବର୍ଷ ଧରି ଘର ବସିଲେ ସିନା କିନ୍ତୁ ମାଲିକଙ୍କ ପ୍ରତିଶ୍ରୁତି ସେମିତି ପ୍ରତିଶ୍ରୁତିରେ ରହିଗଲା ।
ସହାୟତା ଅପେକ୍ଷାରେ 14 ବର୍ଷ