କୋରାପୁଟ: ସହିଦ ଲକ୍ଷ୍ମଣ ନାୟକ ମେଡିକାଲ କଲେଜ ଓ ହସ୍ପିଟାଲରେ ଥିବା ମୃତଦେହ ବାହକ ଗାଡି ଚାଳକଙ୍କୁ ବହୁ ମାସର ଦରମା ମିଳି ନାହିଁ । ଏପରିକି ଖରାପ ହୋଇଥିବା ଗାଡି ମରାମତି ହୋଇ ସାରିଥିଲେ ମଧ୍ୟ ସରକାରୀ ତତ୍ପରତା ଅଭାବରୁ ମରାମତି ଖର୍ଚ୍ଚ ମଧ୍ୟ ଦିଆଯାଇପାରିନାହିଁ । ତେଣେ ମହାପ୍ରୟାଣ ଗାଡିର ଆବଶ୍ୟକତା ଥିବାରୁ ଅସନ୍ତୋଷ ଦେଖାଯାଇଛି ।
ମହାପ୍ରୟାଣ ଗାଡି ଚଳାଉଥିବା ପ୍ରବୀଣ କୁମାର କନ୍ଦପାନଙ୍କ କହିବାନୁଯାୟୀ, ଦୂର ଦୁରାନ୍ତରୁ ଆସି ଏଠାରେ ଚିକିତ୍ସିତ ହୋଇ ମୃତ୍ୟୁବରଣ କରିଥିବା ବ୍ୟକ୍ତିଙ୍କୁ ଘରେ ପହଞ୍ଚାଇବାର ନିରନ୍ତର ସେବା ଯୋଗାଇଆସୁଥିଲେ ହେଁ ତାଙ୍କୁ ଗତ ଚାରି ମାସର ଦରମା ମିଳିନାହିଁ । ବିନା ଦରମାରେ ପରିବାର ଚଳାଇବା ବେଶ କଷ୍ଟକର ହେଉଛି । ତେଣୁ ସେବା ଯୋଗାଇବାରେ ବ୍ୟାଘାତ ସୃଷ୍ଟି ହେଉଥିବା ପ୍ରକାଶ କରିଛନ୍ତି । ଅପରପକ୍ଷରେ ହସ୍ପିଟାଲର ଆଉ ଏକ ଶବ ବାହକ ଗାଡି 'ନିର୍ବାଣ' ଖରାପ ହୋଇ ଗ୍ୟାରେଜକୁ ଯାଇଛି । ଯାହାର ବିଲ ପଇଠ ଜିଲ୍ଲା ମୁଖ୍ୟ ଚିକିତ୍ସାଧିକାରୀଙ୍କ କାର୍ଯ୍ୟାଳୟ ନା ମେଡିକାଲ କଲେଜ କରିବ ସେନେଇ ନିଷ୍ପତ୍ତି ହୋଇପାରୁନଥିବା ଯୋଗୁଁ ମରାମତି ସରିଥିଲେ ମଧ୍ୟ ଗାଡି ଫେରିପାରୁ ନାହିଁ କି କାର୍ଯ୍ୟରେ ଲାଗି ପାରୁ ନାହିଁ ।