ଭୁବନେଶ୍ବର:ରାଜ୍ୟରେ ସ୍ୱାସ୍ଥ୍ୟ ସେବାକୁ ସୁଦୃଢ଼ କରିବା ପାଇଁ ସରକାର ଅନେକ ପଦକ୍ଷେପ ହାତକୁ ନେଇଛନ୍ତି । କ୍ୟାପିଟାଲ ହସ୍ପିଟାଲ, ଯେଉଁଠି ପ୍ରତ୍ୟେକ ଦିନ ହଜାର ହଜାର ରୋଗୀ ଆସିଥାନ୍ତି । ସରକାରୀ ହସ୍ପିଟାଲ ହୋଇଥିବାରୁ ମାଗଣାରେ ଭଲ ଚିକିତ୍ସା ପାଇଁ ଭୁବନେଶ୍ୱର ତଥା ରାଜ୍ୟର ବିଭିନ୍ନ ସ୍ଥାନରୁ ହଜାର ହଜାର ରୋଗୀ ଏହା ଉପରେ ନିର୍ଭର କରିଥାନ୍ତି । ବିଭିନ୍ନ ବିଭାଗକୁ ଆସୁଥିବା କେତେକ ସୁନାମଧନ୍ୟ ଡାକ୍ତରଙ୍କ ନିକଟରେ ଚିକିତ୍ସିତ ହେବା ପାଇଁ ପ୍ରତିଦିନ ରୋଗୀଙ୍କ ଭିଡ ଲାଗିରହିଥାଏ । କିନ୍ତୁ ରୋଗୀଙ୍କ ପାଇଁ କ୍ୟାପିଟାଲ ହସ୍ପିଟାଲରେ ନାହାନ୍ତି ଡାକ୍ତର ।
କ୍ୟାପିଟାଲ ହସ୍ପିଟାଲରେ ଥିବା ନିରୋଲୋଜି ଏବଂ ନେଫ୍ରଲୋଜି ବିଭାଗରେ ଡାକ୍ତର ସଙ୍କଟ ଦେଖାଦେଇଛି । ଦୈନିକ ହଜାର ହଜାର ସଂଖ୍ୟାରେ ରୋଗୀ ଆସୁଥିଲେ ମଧ୍ୟ ଡାକ୍ତର ଅଭାବରୁ ରୋଗୀ ସେବାରେ ବାଧା ଉପୁଜିିଛି । ପୂର୍ବରୁ ଗୋଟିଏ ଦିନ ମାତ୍ର ରୋଗୀଙ୍କୁ ଦେଖୁଥିବା ବେଳେ ଏଣିକି 3 ଦିନ ଡାକ୍ତର ରୋଗୀଙ୍କୁ ଦେଖିବେ । ଯାହା ଫଳରେ ଭିଡ କମିବା ସହ ରୋଗୀଙ୍କୁ ଉଚିତ୍ ମାନର ସେବା ଯୋଗାଇ ଦିଆଯିବ । କିନ୍ତୁ ଏପଟେ କ୍ୟାପିଟାଲ ହସ୍ପିଟାଲରେ ଡାକ୍ତର ଅଭାବ । ଡାକ୍ତରଖାନାରେ ଅନେକ ବିଭାଗ ରହିଛି ଯେଉଁଠି ଗୋଟିଏ କିମ୍ବା ଦୁଇଟି ଡାକ୍ତର ରହିଥିବେ ।
ତେବେ ମୁଖ୍ୟ ବିଭାଗ ହେଉଛି ଆଶୁ ବିଭାଗ । ଯେଉଁଥିରେ 25 ଜଣ ଡାକ୍ତର ରହିବା ଆବଶ୍ୟକ । ସେଥିରେ ମାତ୍ର 6 ଜଣ ଡାକ୍ତର ରହିଛନ୍ତି । ବାକି 19ଟି ଡାକ୍ତର ଚାକିରି ଛାଡ଼ିଲେଣି । ଏହି 6 ଜଣ ଡାକ୍ତରଙ୍କ ମଧ୍ୟରୁ ପ୍ରତି ସିଫ୍ଟରେ 2 ଜଣ ରହିଛନ୍ତି । ତେଣୁ ଡାକ୍ତର ଅଭାବରୁ ଅନେକ ସମୟରେ ରୋଗୀ ସେବା ବାଧାପ୍ରାପ୍ତ ହେଉଛି । ସେହିପରି କ୍ୟାପିଟାଲ ହସ୍ପିଟାଲରେ ଥିବା କର୍କଟ ବିଭାଗ ଉପରେ ରାଜ୍ୟ ତଥା ରାଜ୍ୟ ବାହାରର ରୋଗୀ ନିର୍ଭର କରନ୍ତି । ଉତ୍ତମ ଚିକିତ୍ସା ଦେବା ନିମନ୍ତେ ୧୬ ଶଯ୍ୟା ବିଶିଷ୍ଟ ଏକ ଓ୍ୱାର୍ଡ ନିର୍ମାଣ କରାଯାଇଛି । କିନ୍ତୁ କର୍ମଚାରୀ ଏବଂ ଯନ୍ତ୍ରପାତିର ଅଭାବରୁ କର୍କଟ ରୋଗର ଚିକିତ୍ସା ଉପରେ ଲୋକଙ୍କ ଭରସା ପାଉନାହିଁ ।