ଭୁବନେଶ୍ବର: ରାଜଧାନୀରେ କର୍ପୋରେଟରଙ୍କ ସହଯୋଗୀଙ୍କ ଗୁଣ୍ଡାରାଜ ! ସାମ୍ନାକୁ ଆସିଲା ନିର୍ଦ୍ଦିଷ୍ଟ ରାଜନୈତିକ ଦଳର କର୍ମକର୍ତ୍ତାଙ୍କ ଦାଦାଗିରି । ବରଯାତ୍ରୀ ରୋଷଣି ବେଳେ ପୋଲିସ ବାରଣ କରିବାରୁ ଧକ୍କା ପକାଇ ପୋଲିସକୁ ଅଶ୍ଳୀଳ ଭାଷାରେ ଗାଳି ଗୁଲଜ କରି ଦେଲେ ଧମକ । ଏପରିକି ଡିଜେ ବଜାଇବାକୁ ମନା କରିବାରୁ ପୋଲିସକୁ କାମୁଡି ଦେଲେ । ଥାନା ସାମ୍ନାରେ ହଙ୍ଗାମା କରି ଥାନାରେ ରଖିଲେ ୫ ଘଣ୍ଟାରେ ବଦଳି କରିଦେବାକୁ ଧମକ ଦେଇଥିବା ଅଭିଯୋଗ ହୋଇଛି ।
ପୋଲିସକୁ କାମରେ ବାଧା ଦେବା ଓ ଜଣେ ଏସଆଇଙ୍କୁ କାମୁଡି ଦେବା ଅଭିଯୋଗରେ ଜଣେ ଅଭିଯୁକ୍ତକୁ ଗିରଫ କରିଛି ପୋଲିସ । ଗିରଫ ଅଭିଯୁକ୍ତ ଜଣକ ବଡଗଡ଼ ଥାନା ଅଞ୍ଚଳର ସଚିନ ସୌରଭ ମହାନ୍ତି । ସେ ଏକ ନିର୍ଦ୍ଦିଷ୍ଟ ରାଜନୈତିକ ଦଳର କର୍ପୋର୍ଟେରଙ୍କ ସହଯୋଗୀ ବୋଲି ଜଣାପଡିଛି । ସୂଚନା ମୁତାବକ ଶୁକ୍ରବାର ରାତି ପ୍ରାୟ ୧୦ଟା ୩୦ସମୟରେ ରାଜଧାନୀର ଶ୍ରୀୟା ଛକରୁ ଖାରବେଳ ନଗର ଥାନା ଆଡକୁ ଇପାରି ସଦାଶିବ କଡ଼ରେ ଥିବା ମଣ୍ଡପକୁ ରୋଷଣି କରି ଆସୁଥିଲେ କିଛି ବରଯାତ୍ରୀ । ଏନେଇ ପାଖରେ ଥିବା ଖାରବେଳ ନଗର ଥାନାର ଜଣେ ଏସଆଇ ରୋଷଣିକୁ ବାରଣ କରିଥିଲେ । ମୁଖ୍ୟ ରାସ୍ତାରେ ଅନୁମତି ନଥିବାରୁ ଉପରେ ରୋଷଣି ନକରି ତଳ ରୋଡରେ ଆସନ୍ତୁ ବୋଲି କହିଥିଲେ ।