ଦେବଗଡ଼: ସିଆରିଆ ନାଳ ଯୋଗୁଁ ଦୈନନ୍ଦିନ ଯାତାୟତରେ ଅସୁବିଧାର ସମ୍ମୁଖୀନ ହେଇ ଆସୁଛନ୍ତି ପାଞ୍ଚୋଟି ଗ୍ରାମର ଜନସାଧାରଣ । ନାଳ ଉପରେ ପୋଲଟିଏ ନିର୍ମାଣ ପାଇଁ ଆଜକୁ ଦୀର୍ଘ 20 ବର୍ଷ ହେଲା ଅଞ୍ଚଳବାସୀ ଦାବି କରି ଆସୁଛନ୍ତି, ହେଲେ ଶୁଣୁନି ପ୍ରଶାସନ । ଏଭଳି ସମସ୍ୟା ଦେଖିବାକୁ ମିଳିଛି ଦେବଗଡ଼ ଜିଲ୍ଲା ତାବଡା ପଞ୍ଚାୟତର ଖମଦଣ୍ଡା ଗାଁରେ ।
ଖମଦଣ୍ଡା ଗାଁ ନିକଟରେ ପ୍ରବାହିତ ହେଉଛି ସିଆରିଆ ନାଳ । ଏହି ନାଳ ପାରିହୋଇ ପ୍ରତିଦିନ ରେଙ୍ଗାଳବେଡା ମୁଖ୍ୟ ରାସ୍ତାକୁ ଯାତାୟତ କରିଥାନ୍ତି ଖମଦଣ୍ଡା, ବିଜାବେରଣୀ, କେନ୍ଦୁଘାଟ ପାଣପୋଷି ଓ ବିଳେଇନାଳି ଆଦି ପାଞ୍ଚୋଟି ଗାଁର ଲୋକେ । ମାତ୍ର ଏହି ଖରସ୍ରୋତା ନାଳ ପାରି ହେବାରେ ଲୋକେ ବହୁ ଅସୁବିଧାର ସମ୍ମୁଖୀନ ହୋଇ ଆସୁଛନ୍ତି । ବର୍ଷାର ଚାରିମାସ ଏଠାରେ ଯାତାୟତ ସମ୍ପୂର୍ଣ୍ଣ ଠପ ହୋଇ ପଡୁଥିବା ବେଳେ, ଅନ୍ୟ ଦିନରେ ମଧ୍ୟ ଏହି ନାଳ ପାରିହେବା କଷ୍ଟସାଧ୍ୟ ହୋଇଥାଏ । ଫଳରେ ରେଙ୍ଗାଳବେଡା ସ୍ଥିତ ଦୈନିକ ବଜାର, ସ୍କୁଲ କଲେଜ ଓ ଡାକ୍ତରଖାନା ଆଦି ସ୍ଥାନକୁ ଯିବାକୁ ଲୋକେ ନାହିଁନଥିବା ଅସୁବିଧା ଭୋଗ କରି ଆସୁଛନ୍ତି ।