ଭୁବନେଶ୍ବର: ଅଗ୍ନିପଥ ଯୋଜନାକୁ ନେଇ ସାରା ଦେଶରେ ବିରୋଧର ସ୍ୱର ତେଜିବାରେ ଲାଗିଛି । ଅଗ୍ନିପଥକୁ ନେଇ ହିଂସା ଓଡ଼ିଶାରେ ଛୁଇଁଛି । ରାଜ୍ୟବ୍ୟାପୀ ଏହାକୁ ବିରୋଧ କରାଯାଇଛି । ତେବେ ଅଗ୍ନିପଥ ଯୋଜନାକୁ ନେଇ ଶାସକ ବିଜେଡି ଦୋ-ମୁହାଁ ନୀତି ଅପଣାଇଛି । ବିଜେଡି ପକ୍ଷରୁ ଏ ନେଇ ବିଧିବଦ୍ଧ ସ୍ପଷ୍ଟ ପ୍ରତିକ୍ରିୟା ମିଳିନାହିଁ । କିନ୍ତୁ ଯୋଜନାକୁ ନେଇ ମତ ରଖିଛନ୍ତି ବିଜେଡି ରାଜ୍ୟସଭା ସାଂସଦ ଓ ରାଜ୍ୟ ସରକାରଙ୍କ ମନ୍ତ୍ରୀ । ସାଂସଦ ଯୋଜନାକୁ ସମର୍ଥନ କରି ଟ୍ୱିଟ କରିଥିବାବେଳେ ମନ୍ତ୍ରୀ ଯୋଜନାକୁ ସମାଲୋଚନା କରିଛନ୍ତି । ଯାହାକୁ ନେଇ ବିଜେଡି ପକ୍ଷ ନେଇ ଦ୍ୱନ୍ଦ ସୃଷ୍ଟି ହୋଇଛି ।
ଅଗ୍ନିପଥ ଯୋଜନାକୁ ନେଇ ବିଭିନ୍ନ ସ୍ଥାନରେ ବିକ୍ଷୋଭ ପ୍ରଦର୍ଶନ ଜାରି ରହିଛି । ହେଲେ ବିଜେଡି ସାଂସଦ ଡକ୍ଟର ଅମର ପଟ୍ଟନାୟକ ଏହାର ପ୍ରଶଂସା କରିଛନ୍ତି । ଟ୍ୱିଟ କରି ଅମର ଲେଖିଛନ୍ତି ଯେ, କେନ୍ଦ୍ର ସରକାରଙ୍କ ଅଗ୍ନିପଥ ଯୋଜନା ଏକ ବିଚକ୍ଷଣ ଯୋଜନା । ଦେଶର ସେବା କରିବ ପାଇଁ ଏହି ଯୋଜନା ସିଧାସଳଖ ଯୁବପୀଢ଼ିଙ୍କ ପାଇଁ ସୁଯୋଗ ଆଣିଦେବ । ତେବେ ଏହା ସହ ଏହି ଅଗ୍ନିବୀରମାନଙ୍କୁ ସରକାରୀ ଚାକିରି କ୍ଷେତ୍ରରେ ଅଗ୍ରାଧିକାର ଦିଆଗଲେ ଭଲ ହୁଅନ୍ତା । ସରକାରୀ ଚାକିରି ପାଇଁ ସେମାନଙ୍କୁ ଅଗ୍ରାଧିକାର ଦିଆଯିବାକୁ ନିୟମ ହେବା ଉଚିତ ବୋଲି ସେ ଟ୍ୱିଟ କରିଛନ୍ତି ।