ଭୁବନେଶ୍ବର: ସୋମବାର ସନ୍ଧ୍ୟାରେ ପ୍ରକାଶ ପାଇଛି 2018 ବ୍ୟାଚର ଓପିଏସସି ପରୀକ୍ଷା ଫଳ। ଏଥିରେ ମୋଟ 218ଜଣ ପରୀକ୍ଷାର୍ଥୀ କୃତକାର୍ଯ୍ୟ ହୋଇଛନ୍ତି । ଯେଉଁଥିରେ ନିଜର ପ୍ରଥମ ପ୍ରଚେଷ୍ଟାରେ ସଫଳତା ହାସଲ କରିଛନ୍ତି ଭୁବନେଶ୍ବରର ସୁଧାପଦ୍ମା ଲେଙ୍କା । ନିଜ ସଫଳତାରେ ସେ ବହୁତ ଖୁସି ଅଛନ୍ତି । ସୁଧାପଦ୍ମା ନିଜ ସଫଳତାର ଶ୍ରେୟ ଭଗବାନ, ପିତା ପ୍ରଫେସର ସୁଧାଂଶୁ ଶେଖର ଲେଙ୍କା ଓ ମାତା ଉର୍ମିଳା ରାଉତ, ଅଜା, ଆଈ ଓ ଭାଇଙ୍କୁ ଦେବା ସହ ନିଜର ପରିଶ୍ରମର ଫଳ ପାଇଥିବା କହିଛନ୍ତି।
ତାଙ୍କ ପରିବାରରୁ ଲଗାତାର ଭାବେ ଓଡିଶା ପ୍ରସାଶନିକ ସେବା ପରୀକ୍ଷାରେ ସଫଳତା ସାଉଁଟିଥିବା ଜଣାପଡିଛି। 2016ରେ ତାଙ୍କ ବଡ଼ ଭାଇ ଏହି ପରୀକ୍ଷାରେ କୃତକାର୍ଯ୍ୟ ହୋଇଥିବାବେଳେ 2017ରେ ଆଉ ଜଣେ ଭାଇ ଏବଂ 2018ରେ ସେ ନିଜେ ଏହି ସଫଳତା ହାସଲ କରିଛନ୍ତି । ଏହି ପରୀକ୍ଷାରେ ସେ 38 ନମ୍ବର ସ୍ଥାନ ପାଇଥିବା ବେଳେ ବିନା କୌଣସି କୋଚିଂରେ ନିଜର ଅଧବସାୟ ବଳରେ ଏହି ସଫଳତା ପାଇଛନ୍ତି। ସେ ଶିକ୍ଷା, ମହିଳା ଓ ଶିଶୁ କଲ୍ୟାଣ ବିଭାଗ ଭଳି କ୍ଷେତ୍ରରେ କାର୍ଯ୍ୟ କରିବାକୁ ଆଗ୍ରହୀ ଥିବା କହିଛନ୍ତି । ସେହିପରି ସେ ଯୁବପୀଢ଼ିଙ୍କୁ ନିଜ ଉପରେ ବିଶ୍ବାସ ରଖି ନିୟମିତ ଏକାଗ୍ରତାର ସହ ପରିଶ୍ରମ କଲେ ସୁଫଳ ମିଳିବ ପ୍ରକାଶ କରିଛନ୍ତି ।