ଡେରାଡୁନ: ଜପ ତପ, ଆସ୍ଥାର ଭୂମି ଭାରତ । ଭାରତୀୟ ସଂସ୍କୃତି ଓ ସଭ୍ୟତାର ଆକର୍ଷଣ ବିଦେଶୀ ନାଗରିକଙ୍କୁ ମଧ୍ୟ ଗଭୀର ଭାବେ ପ୍ରଭାବିତ କରିଥାଏ । ସେଥିପାଇଁ ତ ସୁଦୂର ଋଷିଆର ୩ ଜଣ ନାଗରିକ ଧର୍ମନଗରୀ ଉତ୍ତରାଖଣ୍ଡ ଆସି ପୂର୍ଣ୍ଣ ହିନ୍ଦୁ ରୀତିନୀତିରେ ବିବାହ କରିଛନ୍ତି । ଦେବଭୂମି ସ୍ଥିତ ଅଖଣ୍ଡ ପରମଧାମ ଆଶ୍ରମରେ ସେମାନଙ୍କର ବିବାହ ସମାରୋହ ଅନୁଷ୍ଠିତ ହୋଇଯାଇଛି । ବିବାହ ଉତ୍ସବରେ ନବଦମ୍ପତିଙ୍କ ଋଷୀୟ ବନ୍ଧୁମାନେ ପାରମ୍ପରିକ ବାଦ୍ୟଯନ୍ତ୍ର ଢୋଲ ବାଜାର ତାଳେ ତାଳେ ଖୁବ୍ ଡ୍ୟାନ୍ସ କରିଥିଲେ ।
ଭାରତୀୟ ରୀତିନୀତିରେ ହେଲା ସାତଫେରା:୫୦ ଜଣିଆ ଋଷିଆ ନାଗରିକଙ୍କ ଏକ ଦଳ ହରିଦ୍ବାରା ଯାତ୍ରା କରିଥିଲେ । ଭାରତୀୟ ସଂସ୍କୃତି ସେମାନଙ୍କୁ ଏତେମାତ୍ରାରେ ଆକର୍ଷିତ କରିଥିଲା ଯେ, ସେମାନଙ୍କ ମଧ୍ୟରୁ ୩ ଜଣ ପ୍ରେମୀ ଯୁଗଳ ଏହିଠାରେ ହିଁ ଭାରତୀୟ ରୀତିନୀତିରେ ବିବାହ ବନ୍ଧନରେ ବାନ୍ଧି ହେବାକୁ ମନସ୍ଥ କରିଥିଲେ । ଏହାପରେ ପରମଧାମ ଆଶ୍ରମରେ ବିବାହର ଆୟୋଜନ ହୋଇଥିଲା । ରୀତିନୀତି ଅନୁଯାୟୀ, ୩ ଜଣ ଋଷୀୟ ଯୁବକ ବରବେଶରେ ବରଯାତ୍ରୀ ନେଇ ପହଞ୍ଚିଥିଲେ । ଆଶ୍ରମରେ ଥିବା ଶିବ ମନ୍ଦିରରେ ନିଜ ନିଜ ଭାବିପତ୍ନୀଙ୍କ ସହ ମହାଦେବଙ୍କ ଆର୍ଶୀବାଦ ନେଇଥିଲେ । ଏହାପରେ ପରମଧାମର ଅଧ୍ୟକ୍ଷ ସ୍ବାମୀ ପରମାନନ୍ଦ ଗିରି ମହାରାଜଙ୍କ ଆର୍ଶୀବାଦ ନେଇ ପରସ୍ପରକୁ ବରଣମାଳା ପିନ୍ଧାଇ ଥିଲେ । ପରେ ବ୍ରାହ୍ମଣଙ୍କ ମନ୍ତ୍ରୋପଚାରଣ ସହିତ ପଡିଥିଲା ହାତଗଣ୍ଠି ।
ଏହାମଧ୍ୟ ପଢନ୍ତୁ: ଅଯୋଧ୍ୟାରେ ଭାଇଚାରାର ନିଆରା ଦୃଶ୍ୟ, ମୁସଲମାନଙ୍କ ବିବାହ କାର୍ଡରେ ହିନ୍ଦୁଦେବତା