କୋଲକାତା: ଡାକ୍ତରାଣୀଙ୍କ ମୃତ୍ୟୁ ପାଇଁ ଘରୋଇ ହସ୍ପିଟାଲ ଉପରେ ମୋଟା ଅଙ୍କର ଜରିମାନା । ଚିକିତ୍ସା ଅବହେଳା କାରଣରୁ ଡାକ୍ତରାଣୀଙ୍କ ମୃତ୍ୟୁ ମାମଲାରେ କୋଲକାତାର ଏକ ଘରୋଇ ହସ୍ପିଟାଲ ୧ କୋଟି ୨୫ ଲକ୍ଷ ଟଙ୍କାର ତଣ୍ଡ ଗଣିବ । ହସ୍ପିଟାଲ ପକ୍ଷରୁ ଏହି ଅର୍ଥରାଶି କ୍ଷତିପୂରଣ ଭାବେ ମୃତକଙ୍କ ପରିବାରକୁ ଦିଆଯିବ । ଏନେଇ ଜାତୀୟ ଉପଭୋକ୍ତା ସୁରକ୍ଷା କୋର୍ଟ(NCPC) ନିର୍ଦ୍ଦେଶ ଦେଇଛନ୍ତି । ଆସନ୍ତା ୬ ସପ୍ତାହ ସୁଦ୍ଧା ସମ୍ପୃକ୍ତ ହସ୍ପିଟାଲ ଏହି ଅର୍ଥରାଶି ପ୍ରଦାନ କରିବେ ।
ସୂଚନା ମୁତାବକ, ୨୦୧୪ରେ ଡ. ଅରୁଣିମା ସେନଙ୍କ ମୃତ୍ୟୁ ଘଟିଥିଲା । ଅରୁଣିମା ପଲିସିଷ୍ଟିକ ଓଭାରିଆନ ସିଣ୍ଡ୍ରୋମ ରୋଗରେ ପୀଡିତ ଥିଲେ । ଋତୁସ୍ରାବ ସମୟରେ ତାଙ୍କର ତଳି ପେଟରେ ଅସହ୍ୟ ଯନ୍ତ୍ରଣା ଅନୁଭୂତ ହେବାରୁ ଚିକିତ୍ସା ପାଇଁ ସେ କାର୍ଯ୍ୟ କରୁଥିବା ହସ୍ପିଟାଲରେ ଭର୍ତ୍ତି ହୋଇଥିଲେ । ଡାକ୍ତରମାନେ ତାଙ୍କୁ ଲୋପାରୋସ୍କୋପିକ ଡାଏ ଟେଷ୍ଟା ପାଇଁ ପରାମର୍ଶ ଦେଇଥିଲେ । ହେଲେ ଏଥିରେ ଡାକ୍ତରାଣୀ ଅରାଜି ହୋଇଥିଲେ । କିନ୍ତୁ ଡାକ୍ତରଙ୍କ ଚାପରେ ପଡି ଶେଷରେ ସେ ରାଜି ହୋଇଥିବା ବେଳେ ଚିକିତ୍ସା ସମୟରେ ହୃଦଘାତରେ ତାଙ୍କର ମୃତ୍ୟୁ ହୋଇଯାଇଥିଲା ।