ହାଇଦ୍ରାବାଦ: ଦେଶରେ ଏବେ ଏକାଧିକ ରାଜ୍ୟରେ ରାଜ୍ୟପାଳ ଓ ନିର୍ବାଚିତ ସରକାରଙ୍କ ମଧ୍ୟରେ ଦେଖାଯାଉଥିବା ମତାନ୍ତର ପରବର୍ତ୍ତୀ ସମୟରେ ସାମ୍ବିଧାନିକ ସଙ୍କଟରେ ପରିଣତ ହୋଇଛି । ନିକଟ ଅତୀତରେ ଦିଲ୍ଲୀ, କେରଳ, ପଶ୍ଚିମବଙ୍ଗ, ତାମିଲନାଡୁ ପରି ବିଭିନ୍ନ ରାଜ୍ୟ ଓ କେନ୍ଦ୍ର ଶାସିତ ଅଞ୍ଚଳରେ ଏପରି ଉଦାହରଣ ରହିଛି ଯାହା ଏକ ସାମ୍ବିଧାନିକ ଅପପରମ୍ପରା ସୃଷ୍ଟି କଲାଣି । ତେବେ ଏହାରି ମଧ୍ୟରେ ଆନ୍ଧ୍ରର ବିଦାୟୀ ରାଜ୍ୟପାଳ ବିଶ୍ବଭୂଷଣ ହରିଚନ୍ଦନଙ୍କୁ ବିଦାୟ ଦେବା ବେଳେ ବିମାନ ବନ୍ଦରରେ ପାଦ ଛୁଇଁ ପ୍ରଣାମ କରିଛନ୍ତି ରାଜ୍ୟର ଯୁବ ମୁଖ୍ୟମନ୍ତ୍ରୀ ଜଗନ ମୋହନ ରେଡ୍ଡୀ । ଯାହାକୁ ନେଇ ଏବେ ବେଶ ଚର୍ଚ୍ଚା ହେଉଛି । କେହି କେହି ଏହାକୁ ରାଜନୀତି ଠାରୁ ଉର୍ଦ୍ଧ୍ବରେ ରଖି ସଂସ୍କାର ସହ ଯୋଡି ଚର୍ଚ୍ଚା କରୁଛନ୍ତି ।
ନିକଟରେ ଆନ୍ଧ୍ର ପ୍ରଦେଶର ରାଜ୍ୟପାଳ ବିଶ୍ବଭୂଷଣ ହରିଚନ୍ଦନ ଛତିଶଗଡ ରାଜ୍ୟପାଳ ଭାବେ ନିଯୁକ୍ତି ପାଇଛନ୍ତି । ଆଜି ସେ ଆନ୍ଧ୍ର ପ୍ରଦେଶ ଛାଡିବା ସମୟରେ ବିଜୟଓ୍ବାଡା ବିମାନ ବନ୍ଦରରେ ତାଙ୍କୁ ବିଦାୟକାଳୀନ ସମ୍ବର୍ଦ୍ଧନା ଦେବା ପାଇଁ ପହଞ୍ଚିଥିଲେ ମୁଖ୍ୟମନ୍ତ୍ରୀ ଜଗନ ମୋହନ ରେଡ୍ଡୀ । ସାଙ୍ଗରେ ପତ୍ନୀଙ୍କ ସମେତ ଅନ୍ୟ କିଛି ବରିଷ୍ଠ କ୍ୟାବିନେଟ ସହଯୋଗୀ ମଧ୍ୟ ଥିଲେ । ଏହି ସମୟରେ ସେ ବିଦାୟୀ ରାଜ୍ୟପାଳ ହରିଚନ୍ଦନଙ୍କ ପାଦ ସ୍ପର୍ଷ କରି ପ୍ରଣାମ କରିଥିଲେ । ହରିଚନ୍ଦନ ମଧ୍ୟ ଜଗନଙ୍କ ମଧ୍ୟ ପିଠି ଥାପୁଡାଇଥିଲେ । ଯାହାର ଫଟୋ ଏବେ ସୋସିଆଲ ମିଡିଆକୁ ଆସିବା ପରେ ଜଗନଙ୍କୁ ବେଶ ପ୍ରଶଂସା କରାଯାଉଛି । ଏହା ଭାରତୀୟ ରାଜନୀତିରେ ସମ୍ମାନ, ସଂସ୍କାର ଓ ଅନୁଶାସନ ବୋଲି ମଧ୍ୟ କିଛି ସୋସିଆଲ ମିଡିଆ ବ୍ୟବହାରକାରୀ ମତ ଦେଇଛନ୍ତି ।
ତେବେ ଦେଶରେ ନିକଟରେ ଦେଖାଯାଇଥିବା ରାଜ୍ୟପାଳ ଓ ମୁଖ୍ୟମନ୍ତ୍ରୀ ବିବାଦ କାରଣରୁ ଏହି ଫଟୋଟି ବେଶି ଚର୍ଚ୍ଚାରେ ରହିଛି । ନିକଟରେ ଏକାଧିକ ରାଜ୍ୟରେ ରାଜ୍ୟପାଳ ଓ ସରକାରଙ୍କ ମଧ୍ୟରେ ବିଭିନ୍ନ ନୀତିଗତ କାରଣରୁ ସାମ୍ବିଧାନିକ ସଙ୍କଟ ଲାଗିରହିଛି । ଯାହା ସାମ୍ବିଧାନିକ ଅଚଳାବସ୍ଥା ସୃଷ୍ଟି କରିବା ସହ ପଦ ମର୍ଯ୍ୟାଦା ମଧ୍ୟ କ୍ଷୂର୍ଣ୍ଣ କରୁଛି । ସମ୍ବିଧାନର ମହାନତା ଓ ମର୍ଯ୍ୟାଦା ମଧ୍ୟ କ୍ଷୂର୍ଣ୍ଣ ହେବା ସହ ସଙ୍ଘୀୟ ବ୍ୟବସ୍ଥାରେ ଏକ ଅପପରମ୍ପରା ସୃଷ୍ଟି ହେଉଛି ।
ମମତା-ଧନଖଡ ବିବାଦ:-ପଶ୍ଚିମବଙ୍ଗରେ ମମତା ସରକାର ଓ ପୂର୍ବତନ ରାଜ୍ୟପାଳ ତଥା ବର୍ତ୍ତମାନର ଉପରାଷ୍ଟ୍ରପତି ଜଗଦୀପ ଧନଖଡଙ୍କ ମଧ୍ୟରେ ବିବାଦ ଚରମ ସୀମାରେ ପହଞ୍ଚିଥିଲା । ଉଭୟ ପରସ୍ପର ବିରୋଧରେ ନାନା ଅଭିଯୋଗ କରିଥିଲେ । ରାଜ୍ୟପାଳଙ୍କୁ ମମତାଙ୍କ ଦଳୀୟ କର୍ମୀ ବିଜେପି ଏଜେଣ୍ଟ କହିବା ସହ ବିଭିନ୍ନ କାର୍ଯ୍ୟକ୍ରମରେ କ୍ରମାଗତ ବିରୋଧ କରୁଥିଲେ । ରାଜଭବନ ଓ ସରକାରଙ୍କ ବିବାଦ ପାଇଁ ସାମ୍ବିଧାନିକ ପ୍ରକ୍ରିୟା ମଧ୍ୟ ପ୍ରଭାବିତ ହୋଇଥିଲା । ରାଜ୍ୟପାଳ ପକ୍ଷପାତିତା କରୁଥିବା ଅଭିଯୋଗରେ ତାଙ୍କୁ ହଟାଇବା ପାଇଁ ମମତା ଦିଲ୍ଲୀ ଦରବାରରେ ମଧ୍ୟ ଦ୍ବାରସ୍ଥ ହୋଇଥିଲେ । ପରେ ଧନଖଡ ଉପରାଷ୍ଟ୍ରପତି ଭାବେ ନର୍ବାଚିତ ହୋଇ ବେଙ୍ଗଲ ଛାଡିବା ପରେ ସ୍ଥିତି ଶାନ୍ତ ପଡିଥିଲା ।