ହାଇଦ୍ରାବାଦ: ପ୍ରତ୍ୟେକ ଝିଅ ଚାହାଁନ୍ତି ସୁନ୍ଦର ଦେଖାଯିବାକୁ। ଆଉ ଏହି ସୁନ୍ଦରତା ହିଁ ତାଙ୍କ ପାଇଁ କାଳ ହୋଇଥାଏ। ସମାଜରେ ବସବାସ କରୁଥିବା କିଛି ଦୃଷ୍ଟ ପ୍ରକୃତିର ଲୋକ ଏହାକୁ ସହଜରେ ଗ୍ରହଣ କରିପାରନ୍ତି ନାହିଁ। ସେଥିପାଇଁ ତ ନିଜ ମନରେ ଜଳୁଥିବା ରାଗକୁ ଶାନ୍ତ କରିବା ପାଇଁ ସେମାନେ ଏସିଡର ସାହାଯ୍ୟ ନେଇଥାନ୍ତି । ଏସିଡ ଏମିତି ଏକ ପଦାର୍ଥ, ଯାହା ଜଣେ ଝିଅର ଜୀବନକୁ ନଷ୍ଟ କରିଦେଇଥାଏ। ଜୀବନରେ ବହୁତ ପ୍ରକାର ଘଟଣା ଘଟିଥାଏ। କିନ୍ତୁ ଏମିତି କିଛି ଘଟଣା ଘଟିଥାଏ, ଯାହା ଜଣେ ଝିଅର ଅସ୍ତିତ୍ବକୁ ଭାଙ୍ଗିରୁଜି ଚୁରମାର କରିଦେଇଥାଏ। ସେଥିମଧ୍ୟରୁ ଏସିଡ ଆଟାକ୍ ଘଟଣା ଅନ୍ୟତମ। ଏହା ଜଣେ ଝିଅର ଶରୀରକୁ ପୋଡି ପାଉଁଶକୁ କରି ଦେଇ ନଥାଏ, ତାର ମନ, ଆତ୍ମା, ଅସ୍ତିତ୍ବ ଓ ସ୍ବାଭିମାନକୁ ପୋଡି ଜାଳି ଛାରଖାର କରିଦେଇଥାଏ।
ନିକଟରେ ରିଲିଜ ହୋଇଥିବା ଚଳଚ୍ଚିତ୍ର ଛପାକରେ ଏସିଡ୍ ପୀଡିତା ଲକ୍ଷ୍ମୀ ଅଗ୍ରୱାଲଙ୍କ ଜୀବନୀ କାହାଣୀ ପ୍ରଦର୍ଶିତ ହୋଇଥିଲା। ଯାହା ଅନେକ ଦର୍ଶକଙ୍କ ମନକୁ ଛୁଇଁ ଥିବାବେଳେ ଅନେକ ବିରୋଧ କରିଥିଲେ। ସେହିପରି ଆଜି ଆମେ ଆପଣଙ୍କୁ ଏମିତି ଏକ ଏସିଡ୍ ପୀଡିତାଙ୍କ ସମ୍ପର୍କରେ କହିବୁ, ଯାହାକୁ ଶୁଣିଲେ ଆପଣଙ୍କ ଲୋମ ଟାଙ୍କୁରି ଉଠିବ। ସେ ହେଉଛନ୍ତି ପଞ୍ଜାବର ରୂପନଗରସ୍ଥିତ ମଣ୍ଡୋଲି ଗାଁର ଇନ୍ଦ୍ରଜିତ କୌର। ଚାଲନ୍ତୁ ଜାଣିବା ତାଙ୍କ ଜୀବନର ଏକ ଭୟାନକ ଘଟଣା ଉପରେ...
8 ଡିସେମ୍ବର 2011:
ଇନ୍ଦ୍ରଜିତ ରୁବି ଏକ ସ୍କୁଲରେ ଶିକ୍ଷୟିତ୍ରୀ ଭାବେ କାମ କରୁଥିଲେ। ସ୍କୁଲରୁ ଆସିବା ପରେ ସେ ଘରେ ପିଲାମାନଙ୍କୁ ପଢାନ୍ତି । ତାଙ୍କ ଜୀବନ ମଜାମସ୍ତିରେ କଟିଯାଉଥିଲା । କିନ୍ତୁ ଦିନେ ଏମିତି ଏକ ଘଟଣା ଘଟିଥିଲା, ଯାହା ତାଙ୍କ ଜୀବନର ଚିତ୍ରକୁ ସମ୍ପୂର୍ଣ୍ଣ ଭାବେ ବଦଳାଇ ଦେଇଥିଲାା। ଏହି ଘଟଣା 8 ଡିସେମ୍ବର 2011ର। ସନ୍ଧ୍ୟା ସମୟ ହୋଇଥାଏ। ଏହି ସମୟରେ ଇନ୍ଦ୍ରଜିତ ଘରେ ଥିବାବେଳେ କେହି ଜଣେ ତାଙ୍କ କବାଟ ବାଡେଇ ଥିଲେ। ଇନ୍ଦ୍ରଜିତ ବାରମ୍ବାର ବାରମ୍ବାର ତାଙ୍କ ନାଁ ପଚାରୁଥିଲେ ମଧ୍ୟ କେହି କିଛି କହି ନଥିଲେ। କିଛି ସମୟ ପରେ ସେ କବାଟ ଖୋଲି ଦେଖିଲା ବେଳକୁ ଗୋଟିଏ ପୁଅ ଏକ ଜଗ୍ ଧରି ଛିଡା ହୋଇଥିଲା। ଏବଂ ସେଥିରେ ଥିବା ସମସ୍ତ ଏସିଡକୁ ଇନ୍ଦ୍ରଜିତଙ୍କ ମୁହଁ ଉପରକୁ ପକାଇ ଦେଇଥିଲା। ଫଳରେ ଇନ୍ଦ୍ରଜିତଙ୍କ ମୁହଁ ସହ ସମସ୍ତ ଶରୀର ଜଳିବାକୁ ଲାଗିଲା। ଏହି ଘଟଣା ପରେ ସେ ପୁଅ ତ ସେ ସ୍ଥାନରୁ ଦୌଡି ପଳାଇଥିଲା, କିନ୍ତୁ ଇନ୍ଦ୍ରଜିତଙ୍କ ଜୀବନ ଏକପ୍ରକାର ବଦଳିଗଲା।
ଯେ କେହି ବି ଦେଖୁଥିଲେ, ଡରି ଯାଉଥିଲେ:
ଇନ୍ଦ୍ରଜିତ କହିଥିଲେ ଯେ, ଯେବେ ତାଙ୍କ ଉପରେ ଏସିଡ୍ ପକାଯାଇଥିଲା, ତେବେ ସେ ଏକ ପ୍ରକାର ଡରିଯାଇଥିଲେ। ତାଙ୍କର ସମ୍ପୂର୍ଣ୍ଣ ଶରୀର ଜଳିବାକୁ ଲାଗିଥିଲା। ଏବଂ ସେ ଜୋରରେ ଚିତ୍କାର କରିବାକୁ ଲାଗି ଥିଲେ। ଏହାପରେ ତାଙ୍କ ମା ତାଙ୍କୁ ବାଇକରେ ବସାଇ ଘରୋଇ ଡାକ୍ତରଖାନାକୁ ନେଇ ଯାଇଥିଲେ। ସେଠାରୁ ତାଙ୍କୁ ପିଜିଆଇ ଚଣ୍ଡିଗଡ ପଠାଇ ଦିଆଯାଇଥିଲା। ସେଠାରେ ତାଙ୍କର 4 ମାସ ପର୍ଯ୍ୟନ୍ତ ଚିକିତ୍ସା ଜାରି ରହିଥିଲା। ଏହି ସମୟ ମଧ୍ୟରେ ତାଙ୍କ ମୁହଁ ଏମିତି ଖରାପ ହୋଇଯାଇଥିଲା ଯେ, ଯେ କେହି ବି ଦେଖୁଥିଲେ ଡରି ଯାଉଥିଲେ। କିନ୍ତୁ ତାଙ୍କ ମା କେବେ ମଧ୍ୟ ତାଙ୍କୁ ଏକୁଟିଆ ହେବାକୁ ଦେଇ ନଥିଲେ। ଏବଂ ଡାକ୍ତରଙ୍କ ସହ ମିଶି ତାଙ୍କର ଡ୍ରେସିଂ କରୁଥିଲେ। ଚିକିତ୍ସା ଚାଲୁଥିବା ସମୟରେ ହିଁ ତାଙ୍କର ବିଭିନ୍ନ ପ୍ରକାର ଅସ୍ତ୍ରୋପ୍ରଚାର କରାଯାଇଥିଲା। ତାଙ୍କର ପ୍ରଥମ ଅସ୍ତ୍ରୋପ୍ରଚାର ସଫଳ ହୋଇ ପାରିନଥିଲା। କାରଣ ତାଙ୍କ ମୁହଁରେ କୌଣସି ଚର୍ମ ମଧ୍ୟ ସହଜରେ ରହିପାରୁନଥିଲା। ଫଳରେ ଔଷଧ ଦ୍ବାରା ତାଙ୍କ ଚର୍ମକୁ ରଗଡି କରି ସଫା କରିଦିଆଯାଇଥିଲା। ଏହାପରେ ତାଙ୍କର ଦ୍ବିତୀୟ ଅସ୍ତ୍ରୋପ୍ରଚାର କରାଯାଇଥିଲା ।