ନୂଆଦିଲ୍ଲୀ: ପ୍ରକୃତ ନିୟନ୍ତ୍ରଣ ରେଖାରେ ଭାରତ-ଚୀନ ମଧ୍ୟରେ ଉତ୍ତେଜନା ବଢିବାରେ ଲାଗିଛି । ଇତି ମଧ୍ୟରେ ଚୀନ ଏଲଏସିରେ ଅତିରିକ୍ତ ସେନା ମୁତୟନ କରିଛି । ଚୀନର ପିପୁଲ୍ସ ଲିବରେଶନ ଆର୍ମି ଏଲଏସିରେ ନିଜର 20,000 ଯବାନ ମୁତୟନ କରିଥିବା ସୂତ୍ରରୁ ପ୍ରକାଶ ପାଇଛି । ପୂର୍ବରୁ ଚୀନ ପକ୍ଷରୁ ଶିନଜିୟାପିଗଂରେ 10,000-12000 ସୈନିକଙ୍କୁ ନିୟୋଜିତ କରାଯାଇଥିଲା । ତେବେ ସେମାନଙ୍କର ଗତିବିଧିକୁ ଭାରତ ଗମ୍ଭୀରତାର ସହ ନଜର ରଖିଥିବା ସୂତ୍ରରୁ ଜଣାପଡିଛି ।
ଶୀର୍ଷ ସରକାରୀ ସୂତ୍ର ଅନୁଯାୟୀ, ଚୀନ ସେନା ପୂର୍ବ ଲଦାଖ ସେକ୍ଟରରେ ଏଲଏସି ନିକଟରେ ଅତିରିକ୍ତ 2ଟି ଡିଭିଜନ(ପ୍ରାୟ 20,000 ସୈନ୍ୟ ) ମୁତୟନ କରିଛି । ଏହା ବ୍ୟତୀତ ଚୀନ ଉତ୍ତର ଶିନଜିୟାଂଗ ପ୍ରାନ୍ତରେ ନିଜର ଅତିରିକ୍ତ ଡିଭିଜନକୁ ମଧ୍ୟ ନିୟୋଜିତ କରିବାର ନିଷ୍ପତ୍ତି ନେଇଛି । ଏହି ଡିଭିଜନରେ ପ୍ରାୟ 10,000 ସୈନିକ ରହିଛନ୍ତି । ଚୀନର ସେନାର ଏହି ଅତିରିକ୍ତ ଡିଭିଜନ ଆଗାମି 48 ଘଣ୍ଟାରେ ଭାରତୀୟ ସୀମାରେ ପହଞ୍ଚିବାର ସମ୍ଭାବନା ରହିଛି ।