ତାଇପେଇ:ଶକ୍ତିଶାଳୀ ଭୂକମ୍ପ ଝଟକାରେ ଥରିଲା ତାଇଓ୍ବାନର ରାଜଧାନୀ ତାଇପେଇରେ ସମେତ ପୂର୍ବ ଉପକୂଳ । ଆଜି (ସୋମବାର) ସନ୍ଧ୍ୟାରେ ପୂର୍ବ ତାଇୱାନର ଉପକୂଳରେ 6.2 ତୀବ୍ରତାର ଭୂକମ୍ପର ଝଟକା ଅନୁଭୂତ ହୋଇଛି । କିନ୍ତୁ ବ୍ୟାପକ କ୍ଷୟକ୍ଷତି କିମ୍ବା ମୃତାହତ ହୋଇଥିବା ନେଇ କୌଣସି ତତ୍କାଳ ସୂଚନା ଆସି ନଥିବା ତାଇଓ୍ବାନ ସରକାର ସ୍ପଷ୍ଟ କରିଛନ୍ତି ।
ଅନ୍ୟପଟେ ଯୁକ୍ତରାଷ୍ଟ୍ରର ଭୂତତ୍ତ୍ବ ସର୍ବେକ୍ଷଣ ସଂସ୍ଥା ( United States Geological Survey USGS)ର ଆକଳନ ଅନୁସାରେ,ଏହି ଭୂକମ୍ପର କେନ୍ଦ୍ରସ୍ଥଳ ଉପକୂଳବର୍ତ୍ତୀ ସହର ହୁଆଲିଏନ୍ରୁ 64 କିଲୋମିଟର ଦୂର ପୂର୍ବ ସମୁଦ୍ରରେ ରହିଥିଲା । ଏହି ଭୂକମ୍ପ ସମୁଦ୍ରର ପ୍ରାୟ ୨୮ କିମି ବା ୧୭ ମାଇଲ ଗଭୀରତାରେ ସୃଷ୍ଟି ହୋଇଛି । ସେହିପରି ତାଇୱାନର ଅଗ୍ନିଶମ ସେବା କହିଛି ଯେ ପ୍ରାରମ୍ଭିକ ସୂଚନା ଅନୁସାରେ ସେପରି କିଛି ବିଶେଷ କ୍ଷୟକ୍ଷତି ନେଇ ସୂଚନା ଆସିନଥିବା ବେଳେ ଏକ ଅଟ୍ଟାଳିକାରେ ଲିଫ୍ଟରେ ଅଟକି ରହିଥିବା କିଛି ଲୋକଙ୍କୁ ଉଦ୍ଧାରକାରୀ ଦଳ ଉଦ୍ଧାର କରିଛନ୍ତି । ସେହିପରି ଦେଶର କୌଣସି ସ୍ଥାନରୁ ବ୍ୟାପକ ସମ୍ପତ୍ତି ନଷ୍ଟ କିମ୍ବା ଜୀବନହାନୀର ରିପୋର୍ଟ ହସ୍ତଗତ ହୋଇନାହିଁ ।
ଗୌଗଳିକ ଭାବେ ତାଇଓ୍ବାନ ଏକ ଦ୍ବୀପ ହୋଇଥିବା ବେଳେ ଦୁଇଟି tectonics Plate ମିଳନସ୍ଥଳରେ ଅବସ୍ଥିତ ଥିବାରୁ ଏଠାରେ ନିୟମିତ ଭାବରେ ଭୂକମ୍ପ ଅନୁଭୂତ ହୋଇଥାଏ । 6.2 ରୁ ଉର୍ଦ୍ଧ୍ବ ଏହି ତୀବ୍ରତାର କେତେକ ଭୂକମ୍ପ ପ୍ରଭୂତ କ୍ଷତି ଘଟାଇବାର ଆଶଙ୍କା ଥିବା ବିଶେଷଜ୍ଞ କହିଥିବା ବେଳେ ଏଥିରେ ସେପରି କିଛି କ୍ଷୟକ୍ଷତି ନହେବା ତାଇଓ୍ବାନବାସୀଙ୍କୁ ଆଶ୍ବସ୍ତ କରିଛି ।