ରାୟଗଡା଼: ଜମି ବିବାଦ ପାଇଁ ଦାଦାକୁ ହାଣିଲା ପୁତୁରା । ପୁତୁରାର ଟାଙ୍ଗିଆ ଚୋଟରେ ଚାଲିଗଲା ଦାଦାର ଜୀବନ । ତେବେ ରାୟଗଡ଼ା ଜିଲ୍ଲା ରାୟଗଡ ବ୍ଲକ ଅନ୍ତର୍ଗତ କୁମ୍ଭିକୋଟା ପଞ୍ଚାୟତର ପୁଞ୍ଜାପାଇ ଗ୍ରାମରେ ଆଜି (ବୁଧବାର) ପୂର୍ବାହ୍ନରେ ଏଭଳି ଏକ ଅଭାବନୀୟ ହତ୍ୟାକାଣ୍ଡ ଘଟିଥିବା ସୂଚନା ମିଳିଛି । ଏନେଇ ପୋଲିସ ଅଭିଯୁକ୍ତ ପୁତୁରାକୁ ଗିରଫ କରିବାସହ ଅଧିକ ତଦନ୍ତ ଜାରି ରହିଛି ।
ସୂଚନା ଅନୁସାରେ, ରାୟଗଡ଼ା ଜିଲ୍ଲା ରାୟଗଡ ବ୍ଲକ ଅନ୍ତର୍ଗତ କୁମ୍ଭିକୋଟା ପଞ୍ଚାୟତର ପୁଞ୍ଜାପାଇ ଗ୍ରାମର ଲାଛା ମାଣ୍ଡିଙ୍ଗି (୫୦) ଓ ମଦନ ମାଣ୍ଡାଙ୍ଗି ସମ୍ପର୍କରେ ଦାଦା ପୁତୁରା । ପୁଞ୍ଜାପାଇ ଗ୍ରାମରେ ଉଭୟଙ୍କ ଜମି ରହିଛି । ତେବେ ମଦନର ଜମିକୁ ଲାଛା ମାଣ୍ଡାଙ୍ଗି ବହୁଦିନ ଧରି ଜୋର ଜବରଦସ୍ତ ଚାଷ କରି ଆସୁଥିଲା । ସେପଟେ ମଦନ ବାରମ୍ବାର ମନା କରିବା ସତ୍ତ୍ବେ ମଧ୍ୟ ଲାଛା ଶୁଣୁନଥିଲା । ଯାହାକୁ ନେଇ ଉଭୟଙ୍କ ମଧ୍ୟରେ ପୂର୍ବରୁ ଝଗଡ଼ା ଲାଗିରହିଥିଲା । ଏହାକୁ ନେଇ ମଦନ ମନ ଭିତରେ ଲାଛା ଉପରେ ରାଗ ରଖିଥିଲା । ଆଉ ଆଜି ଲାଛା କୌଣସି କାମରେ ଯାଉଥିବା ସମୟରେ ତାଙ୍କୁ ଏକୁଟିଆ ଦେଖି ଏକ ଟାଙ୍ଗିଆରେ ଆକ୍ରମଣ କରିଥିଲା ମଦନ । ସେପଟେ ମଦନରେ ଟାଙ୍ଗିଆ ଚୋଟରେ ଘଟଣାସ୍ଥଳରେ ହିଁ ଲାଛା ମୃତ୍ୟୁବରଣ କରିଥିଲା ।