ଭଦ୍ରକରେ ଧଳା ଜହରର ଜାଲ: ବ୍ରାଉନ ସୁଗାର ଓ 30 ଲକ୍ଷ ଟଙ୍କା ସହ ମହିଳା ଗିରଫ

କେଉଁଠୁ ଆଣୁଥିଲେ, କାହାକୁ ବିକୁଥିଲେ, ଖୋଜୁଛି ପୋଲିସ । ମିଳିଲା ଏକାଧିକ ସ୍ମାର୍ଟଫୋନ, ଜୁରରୀ କାଗଜପତ୍ର ଓ ପରିଚୟ ପତ୍ର । ନେଟଓ୍ବାର୍କ ପର୍ଦ୍ଦଫାସ ପାଇଁ ପୋଲିସ କସରତ ।

ଭଦ୍ରକ: ମହିଳାଙ୍କଠାରୁ ଜବତ ହେଲା 16.350 ଗ୍ରାମ ବ୍ରାଉନ ସୁଗାର ଓ ନଗଦ 30 ଲକ୍ଷ ଟଙ୍କା । ସୋମବାର ବ୍ରାଉନ ସୁଗାର କାରବାର ଅଭିଯୋଗରେ ଭଦ୍ରକ ପୌରାଞ୍ଚଳ ଏଲଖା ନୂଆନଗର ଅଞ୍ଚଳରେ ଜଣେ ମହିଳାଙ୍କ ଘରେ ଚଢାଉ କରିଥିଲା ପୋଲିସ । ତେବେ ଏହି ମାମଲାରେ ଚାଞ୍ଚଲ୍ୟକର ତଥ୍ୟ ସାମ୍ନାକୁ ଆଣିଛି ପୋଲିସ । ମହିଳାଜଣକ ଘରୁ ବ୍ରାଉନସୁଗାର ଓ 30 ଲକ୍ଷ ନଗଦ ଟଙ୍କା ଜବତ ହେବା ପରେ ତାଙ୍କୁ କୋର୍ଟ ଫରଓ୍ବାର୍ଡ କରାଯାଇଛି ।

ଖାଲି ଧଳାଜହର ନୁହେଁ, ମିଳିଲା ଏହି ସବୁ:-

ଭଦ୍ରକ ଅତିରିକ୍ତ ଏସପି ଅରୂପ ଅଭିଷେକ ବେହେରା କହିଛନ୍ତି, "ଏହି ଚଢ଼ାଉ ବେଳେ ମହିଳାଙ୍କ ଘରୁ 16.350 ଗ୍ରାମ ବ୍ରାଉନ ସୁଗାର ସହ 30 ଲକ୍ଷ 44 ହଜାର 855 ଟଙ୍କା ମଧ୍ୟ ମିଳିଛି । ଏଥିସହ 5 ଟି ମୋବାଇଲ ଫୋନ, 2ଟି ମଲ୍ଟିମିଡ଼ିଆ ଫୋନ, ବିଭିନ୍ନ ବ୍ୟାଙ୍କର ବ୍ଲାଙ୍କ ଚେକ ଏବଂ ବିଭିନ୍ନ ବେଆଇନ ଷ୍ଟାମ୍ପ ପେପର ମଧ୍ୟ ଜବତ କରାଯାଇଛି ।"

ଅଭିଯୁକ୍ତ ମହିଳା ଗିରଫ:

ଏହି ବ୍ରାଉନ ସୁଗାର କାରବାରରେ ମହିଳାଙ୍କ ସହିତ ଆଉ କେଉଁ କେଉଁ ବ୍ୟକ୍ତିଙ୍କର ସମ୍ପର୍କ ରହିଛି ଓ ବ୍ରାଉନ ସୁଗାର କେଉଁଠୁ ଆଣି ବେପାର କରୁଥିଲେ, ସେନେଇ ଭଦ୍ରକ ଟାଉନ ଥାନା ପୋଲିସ ଅଧିକ ତଦନ୍ତ ଚଳାଉଛି ବୋଲି ସାମ୍ବାଦିକ ସମ୍ମିଳନୀରେ ଅତିରିକ୍ତ ଏସପି ବେହେରା କହିଛନ୍ତି । ତେବେ ଚଢ଼ାଉ ବେଳେ ଅନେକ ଲୋକଙ୍କ ଭୋଟର ପରିଚୟ ପତ୍ର ଏବଂ ଆଧାର କାର୍ଡ ଜବତ କରିଛି ପୋଲିସ । ତେବେ ମିଳିଥିବା ମୋବାଇଲ ଓ କାଗଜପତ୍ର ମାଧ୍ୟମରେ ଏହି ନେଟଓ୍ବାର୍କର ଫର୍ଦ୍ଦାଫାସ କରିବା ପାଇଁ ପୋଲିସ ତଦନ୍ତ ଜାରି ରଖିଛି । ତେଣୁ ସେମାନଙ୍କ ସମ୍ପର୍କରେ ପୋଲିସ ଖୋଜ ଖବର ଆରମ୍ଭ କରିଥିବା ଅତିରିକ୍ତ ଏସପି ସୂଚନା ଦେଇଛନ୍ତି । ଜଣେ ମହିଳା ନିଶା କାରବାରରେ ସମ୍ପୃକ୍ତ ରହି ଧରା ପଡିବା ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି ।

ଇଟିଭି ଭାରତ, ଭଦ୍ରକ