ବ୍ରହ୍ମପୁର: ସ୍ବାଧୀନ ଭାବେ ନିର୍ବାଚନ ଲଢିବେ କଂଗ୍ରେସର ପୂର୍ବତନ ସାଂସଦ ପ୍ରାର୍ଥୀ । ଗତ ନିର୍ବାଚନରେ ପରାଜୟ ପରେ ମଧ୍ୟ ଗତ ପାଞ୍ଚ ବର୍ଷର ରିପୋର୍ଟ କାର୍ଡ ଦେଲେ ଭି. ଚନ୍ଦ୍ରଶେଖର ନାଇଡୁ । ଗତ ସାଧାରଣ ନିର୍ବାଚନରେ ବ୍ରହ୍ମପୁର ଲୋକସଭା ଆସନରୁ କଂଗ୍ରେସ ଦଳରୁ ପ୍ରାର୍ଥୀ ହୋଇ ନିର୍ବାଚନରେ ପ୍ରତିଦ୍ବନ୍ଦ୍ବିତା କରିଥିଲେ ଭି.ଚନ୍ଦ୍ରଶେଖର ନାଇଡୁ । ହେଲେ ଗତ ନିର୍ବାଚନରେ ସେ ପରାଜୟ ହୋଇଥିଲେ ମଧ୍ୟ ଗତ ପାଞ୍ଚ ବର୍ଷ ମଧ୍ୟରେ ସେ ବ୍ରହ୍ମପୁର ଲୋକସଭା କ୍ଷେତ୍ରରେ ନିଜର କିଭଳି କାର୍ଯ୍ୟ କରିଛନ୍ତି । ତାହାକୁ ଚଳିତ ସାଧାରଣ ନିର୍ବାଚନ ପୂର୍ବରୁ ନିଜର ରିପୋର୍ଟ କାର୍ଡ ମାଧ୍ୟମରେ ଜନସାଧାରଣଙ୍କ ସମୁଖରେ ଉପସ୍ଥାପନ କରିଛନ୍ତି ।
ଚଳିତଥର ସାଧାରଣ ନିର୍ବାଚନ ପୂର୍ବରୁ ବ୍ରହ୍ମପୁର ଲୋକସଭା ଆସନରୁ ପାଇଁ କଂଗ୍ରେସ ଦଳ ପକ୍ଷରୁ ଟିକେଟ ଘୋଷଣା ହୋଇସାରିଥିବା ବେଳେ ସେ ଚଳିତ ନିର୍ବାଚନରେ ବ୍ରହ୍ମପୁର ଲୋକସଭା ଆସନରୁ ସ୍ବାଧୀନ ପ୍ରାର୍ଥୀ ଭାବରେ ନିର୍ବାଚନରେ ପ୍ରାର୍ଥୀପତ୍ର ଦାଖଲ କରିବା ନେଇ ଗତକାଲି ଏକ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି । ରାଜ୍ୟ ଠାରୁ ଆରମ୍ଭ କରି ଲୋକସଭା ଏବଂ ବିଧାନସଭା କ୍ଷେତ୍ରରେ ବିଭିନ୍ନ ଦଳୀୟ ପ୍ରାର୍ଥୀଙ୍କ ବିଜୟ ପରେ ସେମାନଙ୍କର ଭୂମିକା ଏବଂ ସ୍ଥାନୀୟ ଅଞ୍ଚଳର ଦାବିକୁ ନେଇ କିଭଳି ସେମାନେ ପ୍ରଶ୍ନ ଉଠାଇଛନ୍ତି, ତାହାକୁ ନେଇ ସମାଲୋଚନା କରିଥିଲେ ଚନ୍ଦ୍ରଶେଖର ।
ଏପରିକି ବ୍ରହ୍ମପୁର ଲୋକସଭା କ୍ଷେତ୍ରରେ ଅନେକ ବ୍ୟକ୍ତି ବିଶେଷ ଚିନ୍ତାଗ୍ରସ୍ତ ରହିଛନ୍ତି । ସେ ଚଳିତ ନିର୍ବାଚନରେ ପ୍ରତିଦ୍ବନ୍ଦ୍ବିତା କରିବା ପାଇଁ ତାଙ୍କୁ ଅଞ୍ଚଳବାସିନ୍ଦାଙ୍କ ପକ୍ଷରୁ ବାରମ୍ବାର ଅନୁରୋଧ ପରେ ସେ ଏପରି ନିଷ୍ପତ୍ତି ନେଇଥିବା କହିଛନ୍ତି । ବର୍ତ୍ତମାନର ପରିସ୍ଥିତିରେ ସେ ସ୍ବାଧୀନ ଭାବରେ ମୈଦାନକୁ ଓହ୍ଲାଇବା ପାଇଁ ଘୋଷଣା କରିଛନ୍ତି । ସେ ପ୍ରାର୍ଥୀପତ୍ର ଦାଖଲ କରିବା ପରେ ସାଧାରଣ ଜନତାଙ୍କ ନିକଟରେ ପ୍ରକୃତ ପ୍ରାର୍ଥୀଙ୍କୁ ବିଜୟୀ କରି ଦେଶର ସଂସଦକୁ ପଠାଇଲେ ନିଜ ଅଞ୍ଚଳର ସମସ୍ୟାର ସମାଧାନ ହେବା ବୋଲି କହିଛନ୍ତି ସେ ।