ଢେଙ୍କାନାଳ: ଦୁର୍ଗା ପୂଜା ନେଇ ଚାରିଆଡେ ଉତ୍ସବର ମାହୋଲ ଚାଲିଥିବା ବେଳେ ଢେଙ୍କାନାଳ ମହିଷାପାଟରୁ ଆସିଛି ଏକ ଦୁଃଖଦ ଖବର । ହୋଟେଲ ନିର୍ମାଣ ପାଇଁ ଛାତ ପଡୁଥିବା ବେଳେ ଭୁଶୁଡି ଗଲା ଛାତ । ଫଳରେ ଜଣଙ୍କର ମୃତ୍ୟୁ ହୋଇଥିବା ବେଳେ ଆଉ ଦୁଇ ଜଣ ଗୁରୁତର ଅଛନ୍ତି । ଅନେକ ଶ୍ରମିକ ଭିତରେ ଛାପି ହୋଇଛନ୍ତି । ଜାରି ରହିଛି ଉଦ୍ଧାର କାର୍ଯ୍ୟ । ମୃତକ ହେଲେ ସୁଧାଶୁଂ ରାଉତ । ଗୁରୁତର ହେଲେ କୈଳାଶ ଚନ୍ଦ୍ର ରାଉତ ଓ ସମରେନ୍ଦ୍ର ରାଉତ । ଏମାନଙ୍କ ଘର ସଦର ଥାନା ଅନ୍ତର୍ଗତ ଖୁଣ୍ଟଝରି ଗାଁରେ ବୋଲି ଜଣାପଡିଛି ।
ଭୁଶୁଡିଲା ଛାତ:
ଢେଙ୍କାନାଳରେ ହୋଟେଲ ନିର୍ମାଣ ଚାଲିଥିବା ବେଳେ ଏକ ବଡ଼ ଧରଣର ଅଘଟଣ ଘଟିଛି । ଏହି ନିର୍ମାଣଧିନ ହୋଟେଲର ତୃତୀୟ ମହଲା ଛାତ ପଡୁଥିବାବେଳେ ଛାତ ଭୁଶୁଡି ପଡିଛି । ମୂଳ ପିଲାର ଭାଙ୍ଗି ଯିବାରୁ ଏପରି ଅଘଟଣ ଘଟିଛି । ଫଳରେ ତଳେ ଓ ଉପରେ କାର୍ଯ୍ୟରତ ଶ୍ରମିକ ଚାପି ହୋଇ ରହିଥିବା ଜଣାପଡିଛି । ଘଟଣାସ୍ଥଳରୁ ବର୍ତ୍ତମାନ ସୁଦ୍ଧା 3 ଜଣଙ୍କୁ ଉଦ୍ଧାର କରାଯାଇଥିବା ବେଳେ ସେଥିରୁ ଜଣଙ୍କ ମୃତ୍ୟୁ ହୋଇଛି । ଏବେବି ଜାରି ରହିଛି ଉଦ୍ଧାରକାର୍ଯ୍ୟ ।
କାମ କରୁଥିଲେ 50 ଜଣ:
ତେବେ ପୂରା ହୋଟେଲ ନିର୍ମାଣ କାମରେ ପ୍ରାୟ 50 ଜଣ ନିୟୋଜିତ ଥିଲେ । ହେଲେ ଛାତ ଭୁଶୁଡି ପଡିବାରୁ ପାଖାପାଖି 10 ଜଣ ଫସି ରହିଥିବା ଅନୁମାନ କରାଯାଉଛି । ହେଲେ ଏହାର ସଠିକ ସୂଚନା ମିଳିପାରିନାହିଁ । ଏବେବି ଜାରି ରହିଛି ଉଦ୍ଧାର କାର୍ଯ୍ୟ । ଗୁରୁତର ଦୁଇ ଶ୍ରମିକଙ୍କୁ ଚିକିତ୍ସା ପାଇଁ ଢେଙ୍କାନାଳ ଜିଲ୍ଲା ମୁଖ୍ୟ ଡାକ୍ତର ଖାନାରେ ଭର୍ତ୍ତି କରାଯାଇଛି ।
ଉଦ୍ଧାରକାର୍ଯ୍ୟରେ ଓଡ୍ରାଫ ଟିମ:
ଖବର ପାଇ ଢେଙ୍କାନାଳ ଓଡ୍ରାଫ ସମେତ ଗଁନ୍ଦିଆ, ଓଡ଼ପଡାରୁ ଅଗ୍ନିଶମ ବାହିନୀ ଜେସିବି, ବୁଲଡୋଜର ଆଦି ସହାୟତାରେ ଉଦ୍ଧାର କାର୍ଯ୍ୟ ଯୁଦ୍ଧକାଳୀନ ଭିତ୍ତିରେ ଚାଲୁ ରହିଛି । ଘଟଣା ସ୍ଥଳରେ ଢେଙ୍କାନାଳ ଜିଲ୍ଲାପାଳ ସୋମେଶ ଉପାଧ୍ୟାୟ, ଏସପି ଅଭିନବ ସୋନକର ଓ ଉପଜିଲ୍ଲାପାଳଙ୍କ ସମେତ ଜିଲ୍ଲାସ୍ତରୀୟ ଅଧିକାରୀ ମାନେ ଉପସ୍ଥିତ ରହି ଉଦ୍ଧାର କାର୍ଯ୍ୟ ତଦାରଖ କରୁଛନ୍ତି । ଉଦ୍ଧାର କାର୍ଯ୍ୟ ସରିଲେ କେତେ ଶ୍ରମିକ ମୃତାହତ ତାହା ଜଣାପଡିବ ବୋଲି ପ୍ରଶାସନ ପକ୍ଷରୁ କୁହାଯାଇଛି ।