ଗାଁ ଗିଳିଦେବ ସମୁଦ୍ର: କୋଣାର୍କରେ କୂଳ ଲଙ୍ଘୁଛି, ଭିଟାମାଟି ଛାଡିବା ଭୟରେ 35 ଗାଁ - Village Submerge under Sea

Village Submerge under Sea: ଦିନକୁ ଦିନ ଅଶାନ୍ତ ହେଉଛି ସମୁଦ୍ର । ପୂର୍ଣ୍ଣିମା-ଅମାବାସ୍ୟାରେ ଛାତିରେ ପଶୁଛି ଛନକା । ସେପଟେ ସମୁଦ୍ର ଗର୍ଭରେ ଲୀନ ହେଲାଣି ବିସ୍ତିର୍ଣ୍ଣ ବାଲିବନ୍ତ ସହ ଝାଉଁ ଜଙ୍ଗଲ । ଏହି ସମସ୍ୟାର ସ୍ଥାୟୀ ସମାଧାନ ପାଇଁ ଦାବି କଲେ ଗ୍ରାମବାସୀ । ଅଧିକ ପଢନ୍ତୁ

ନିମାପଡ଼ା:ସମୁଦ୍ର ଗର୍ଭରେ ଭିଟାମାଟି । ଭୟରେ ଦିନ କାଟୁଛନ୍ତି ଲୋକେ । ଭିଟାମାଟି ଛାଡିବା ଆଶଙ୍କାରେ ୩୫ଟି ଗାଁର ଲୋକେ । ବିଶାଳ ବାଲିବନ୍ତ ସହ ଝାଉଁ ଜଙ୍ଗଲ ନଷ୍ଟ କରିଛି ସମୁଦ୍ର ,ଚିନ୍ତାରେ ପରିବେଶବିତ୍ । ପୁରୀ ଜିଲ୍ଲା କୋଣାର୍କ ଉପକୂଳ ଅଭୟାରଣ୍ୟ ବର୍ତ୍ତମାନ ବିପଦଗାମୀ ହେବାକୁ ବସିଲାଣି । ବଡ ବଡ ବାଲିବନ୍ତ ସହ ଝାଉଁ ଜଙ୍ଗଲ ଏବେ ସମୁଦ୍ର ଗର୍ଭରେ ଲୀନ ହେବାକୁ ଯାଉଥିବା ଦେଖିବାକୁ ମିଳିଛି । ପୁରୀ ଠାରୁ ଅସ୍ତରଙ୍ଗ ପର୍ଯ୍ୟନ୍ତ 46 କିଲୋମିଟର ଜଙ୍ଗଲ ସହ ୩୫ଟି ଗାଁ ଏବେ ବିପଦପୂର୍ଣ୍ଣ ଅବସ୍ଥାରେ ରହିଛି । ଯାହାର ସ୍ଥାୟୀ ପ୍ରତିକାର କରିବା ପାଇଁ ଦାବି ହୋଇଛି ।

ଗାଁ ମୁହାଁ ସମୁଦ୍ର:

ପୁରୀ ଜିଲ୍ଲାର ଉପକୂଳିଆ ଗାଁ ଗୁଡିକୁ ଜୁଆର ଭୟ ଘାରିଛି । ଜିଲ୍ଲାର ୩୫ଟି ଗାଁର ହଜାର ହଜାର ଲୋକେ ଏବେ ସମୁଦ୍ରର କରାଳ ରୂପ ଦେଖି ଭୟଭୀତ । ପୂର୍ବରୁ ଗାଁ ଠାରୁ ସମୁଦ୍ର ୨ରୁ ୩ କିଲୋମିଟର ଦୂରତା ଥିବାବେଳେ ଏବେ ଗାଁ ମୁହାଁ ସମୁଦ୍ର । ବିଗତ ଦିନରେ ତଣ୍ଡାହର, ଛେନୁଅ, କଂଅରପୁର ଗାଁ ସମୁଦ୍ର ଗର୍ଭରେ ଲୀନ ହୋଇଯାଇଛି । ଏହି ତିନୋଟି ଗାଁର ଲୋକେ ତିନିତିନି ଥର ଭିଟାମାଟି ଛାଡି ଅନ୍ୟତ୍ର ସ୍ଥାନାନ୍ତର ହୋଇଛନ୍ତି । ହେଲେ ଏସବୁ ଦେଖି ପ୍ରଶାସନର ନିରବତାକୁ ନେଇ ଉଠିଛି ବଡ ପ୍ରଶ୍ନ ।

ପୂର୍ଣ୍ଣିମା-ଅମାବାସ୍ୟାରେ ଛାତିରେ ପଶୁଛି ଛନକା:

ପୂର୍ଣ୍ଣିମା-ଅମାବାସ୍ୟା ତିଥିରେ ସମୁଦ୍ରର ବଡ ବଡ ଢେଉ ଆସି ବିସ୍ତିର୍ଣ୍ଣ ବାଲିବନ୍ତ ଖାଇ ଝାଉଁ ଜଙ୍ଗଲ ନଷ୍ଟ କରି ବାକୁ ବସିଲାଣି । ଜୁଆର ମାଡ଼ ଦ୍ବାରା ଅନେକ ଜନବସତିରେ ଲୁଣି ପାଣି ପସି ବ୍ୟାପକ କ୍ଷୟକ୍ଷତି ହେଉଛି । ସେପଟେ ପ୍ରତିବର୍ଷ ଚାଷ ଜମୀରେ ଲୁଣି ପାଣି ମାଡ଼ି ଯାଇ ବ୍ୟାପକ ଫସଲ ନଷ୍ଟ ହେଉଛି । ଏନେଇ ଚିନ୍ତା ପ୍ରକଟ କରିଛନ୍ତି ପରିବେଶବିତ । ତେବେ ଗ୍ରାମବାସୀମାନେ ବାରମ୍ବାର ଏହାର ସ୍ଥାୟୀ ସମାଧାନ ପାଇଁ ଦାବି କରିଥିଲେ ମଧ୍ୟ କେହି କର୍ଣ୍ଣପାତ କରୁନଥିବା ଅଭିଯୋଗ କରିଛନ୍ତି ।

ସ୍ଥାୟୀ ପ୍ରତିକାର ଦାବି କଲେ ଗ୍ରାମବାସୀ:ଯଦି ଏପରି ସମୁଦ୍ର ବାଲିବନ୍ତ ଖାଇ ଗାଁ ଆଡକୁ ଜୁଆର ମାଡି ଆସେ ତେବେ ବାଧ୍ୟ ହୋଇ ଗ୍ରାମବାସୀ ମାନେ ନିଜର ଗାଁ ଭିଟାମାଟି ଛାଡ଼ିବାକୁ ବାଧ୍ୟ ହେବେ ବୋଲି କହିଛନ୍ତି ଲୋକେ । ତୁରନ୍ତ ଏଦିଗରେ ରାଜ୍ୟ ସରକାର ଏବଂ ଜିଲ୍ଲା ପ୍ରଶାସନ ଦୃଷ୍ଟି ଦେଇ ବାଲିବନ୍ତ ସହ ଜଙ୍ଗଲକୁ ସୁରକ୍ଷା ଦେବାକୁ ଦାବି କରିଛନ୍ତି ଗ୍ରାମବାସୀ ।

ଇଟିଭି ଭାରତ, ନିମାପଡ଼ା