ବେଆଇନ ଉଚ୍ଛେଦର ୧୫ ଦିନ ପୂର୍ବରୁ ଦିଅ ନୋଟିସ୍‌, ନିର୍ଦ୍ଦେଶ ଦେଲେ ହାଇକୋର୍ଟ

ବିନା ନୋଟିସରେ ବେଆଇନ ଜବରଦଖଲ ଉଚ୍ଛେଦ ହୋଇପାରିବନି । ଉଚ୍ଛେଦ ପୂର୍ବରୁ ୧୫ ଦିନର ନୋଟିସ ଦେବାକୁ ହାଇକୋର୍ଟ ନିର୍ଦ୍ଦେଶ ଦେଇଛନ୍ତି ।

କଟକ: ଜବରଦଖଲ ଉଚ୍ଛେଦ କରିବା ପୂର୍ବରୁ ପକ୍ଷଙ୍କୁ ୧୫ ଦିନର ନୋଟିସ ଦେବା ପାଇଁ ନିର୍ଦ୍ଦେଶ ଦେଇଛନ୍ତି ହାଇକୋର୍ଟ । ବେଆଇନ ଜବରଦଖଲ ଉଚ୍ଛେଦ ପୂର୍ବରୁ ଜବରଦଖଲକାରୀଙ୍କୁ ଏହି ନିର୍ଦ୍ଦିଷ୍ଟ ସମୟ ପ୍ରଦାନ କରିବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି । ଏହି ନିୟମକୁ କେବଳ ସହରାଞ୍ଚଳରେ ଲାଗୁ କରିବା ସପକ୍ଷରେ କୋର୍ଟ ଗୁରୁତ୍ୱପୂର୍ଣ୍ଣ ରାୟ ପ୍ରଦାନ କରିଛନ୍ତି । ଭୁବନେଶ୍ୱର ଜାଗମରା ଅଞ୍ଚଳର ମହେନ୍ଦ୍ର ରାୟ ନାମକ ଜଣେ ଆବେଦନକାରୀଙ୍କ ଆବେଦନର ଶୁଣାଣି କରି କୋର୍ଟ ଏହି ନିର୍ଦ୍ଦେଶ ଦେଇଛନ୍ତି । କେବଳ ସେତିକି ନୁହେଁ ଏହି ନିୟମକୁ ସହରାଞ୍ଚଳରେ ଯେପରି କଡାକଡି ଭାବରେ ପାଳନ କରାଯିବ ସେଥିପାଇଁ ବିଏମସି ଏବଂ ସିଏମସି କମିଶନରଙ୍କୁ ହାଇକୋର୍ଟ ତାଗିଦ ମଧ୍ୟ କରିଛନ୍ତି ।

୧୫ ଦିନ ପୂର୍ବରୁ ନୋଟିସ୍:

ଆଜି (ବୁଧବାର) ଓଡ଼ିଶା ହାଇକୋର୍ଟ ଭୁବନେଶ୍ୱର ମ୍ୟୁନିସିପାଲ୍ କର୍ପୋରେସନ୍ (BMC) ଏବଂ କଟକ ମ୍ୟୁନିସିପାଲ୍ କର୍ପୋରେସନ୍ (CMC)ର କମିଶନରମାନଙ୍କୁ ବେଆଇନ ଜବରଦଖଲ ଉଚ୍ଛେଦ କରିବାର ୧୫ ଦିନ ପୂର୍ବରୁ ନୋଟିସ୍ ଜାରି କରିବାକୁ ନିର୍ଦ୍ଦେଶ ଦେଇଛନ୍ତି । ଏହି ନିର୍ଦ୍ଦେଶନାମା ଅନୁଯାୟୀ, ସମ୍ପୃକ୍ତ ସହର ଅଞ୍ଚଳରେ ପୂର୍ବ ସୂଚନା ବିନା ଉଚ୍ଛେଦ କରାଯାଇ ପାରିବ ନାହିଁ । ମ୍ୟୁନିସିପାଲ୍ କର୍ପୋରେସନ୍ ଏହି ଆଇନକୁ କଡ଼ାକଡ଼ି ପାଳନ କରିବାର ଆବଶ୍ୟକତା ଉପରେ ହାଇକୋର୍ଟ ଗୁରୁତ୍ୱାରୋପ କରିଛନ୍ତି ।

ନିର୍ଦ୍ଦେଶ ପାଳନ ପାଇଁ ହାଇକୋର୍ଟ ତାଗିଦ:

ଆବେଦନକାରୀ ମହେନ୍ଦ୍ର ରାୟ ଭୁବନେଶ୍ୱର ଜାଗମରା ଅଞ୍ଚଳର ଜଣେ ଅଧିବାସୀ । ଏକ ନିର୍ଦ୍ଦିଷ୍ଟ ସ୍ଥାନକୁ ବେଆଇନ ଜବରଦଖଲ ଦର୍ଶାଇ ବିଏମସି, ଏକ ଡ଼ାକବାଜି ଯନ୍ତ୍ର ସାହାଯ୍ୟରେ ଉଛେଦ ପାଇଁ ପ୍ରଚାର କରିଥିଲା । ଯାହାକି ଓଡିଶା ପୌର ନିଗମ ଆଇନକୁ ଉଲ୍ଲଘଂନ କରୁଥିବା ଦର୍ଶାଇ ଆବେଦନକାରୀ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ । ଆବେଦନକାରୀ ନିଜ ଆବେଦନରେ ଦର୍ଶାଇ ଥିଲେ ଯେ, ଉଚ୍ଛେଦ ପାଇଁ ତାଙ୍କୁ କୌଣସି ନୋଟିସ ଦିଆ ଯାଇ ନଥିଲା । କୋର୍ଟ ଏହାର ଶୁଣାଣି କରି ଗୁରୁତ୍ତ୍ୱପୂର୍ଣ୍ଣ ରାୟ ପ୍ରଦାନ କରିଛନ୍ତି । ବିନା ନୋଟିସରେ ଉଭୟ ସହରାଞ୍ଚଳରେ ଉଚ୍ଛେଦ ହୋଇ ପାରିବ ନାହିଁ ।

ଏହା ମଧ୍ୟ ପଢ଼ନ୍ତୁ...୯ ଜଣଙ୍କୁ ମୃତ୍ୟୁଦଣ୍ଡ ଶୁଣାଇଥିଲେ ତଳକୋର୍ଟ, କୋହଳ କଲେ ହାଇକୋର୍ଟ ଏହା ମଧ୍ୟ ପଢ଼ନ୍ତୁ...ଅଦାଲତ ଅବମାନନା ମାମଲାର ତଦାରଖ କରିବ କମିଟି, କୋର୍ଟକୁ ଅବଗତ କଲେ ରାଜ୍ୟ ସରକାର

ବିଶେଷକରି ଉଚ୍ଛେଦ ପୂର୍ବରୁ ପକ୍ଷଙ୍କୁ ୧୫ ଦିନ ସମୟ ଦେବା ଉଚିତ । ସେହିପରି ଉଚ୍ଛେଦ ବେଳେ ଓଡିଶା ପୌର ନିଗମ ଆଇନ କଡାକଡି ଅନୁପାଳନ ଉପରେ ଗୁରୁତ୍ୱ ଦେବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି । ଏହି ଶୁଣାଣି ସମୟରେ ଉଭୟ ବିଏମସି ଏବଂ ସିଏମସି କମିଶନର ଭର୍ଚୁଆଲରେ ହାଜର ହୋଇଥିଲେ । ତେବେ ଡାକବାଜି ଯନ୍ତ୍ର ଯୋଗେ ପ୍ରଚାର କରି ଉଚ୍ଛେଦ କରିବାକୁ ବିରୋଧ କରି ଏହି ମାମଲା ଦାୟର ହୋଇଥିଲା । ଆସନ୍ତା ଫେବୃଆରୀ ୧୭ରେ ମାମଲାର ପରବର୍ତ୍ତୀ ଶୁଣାଣି ପାଇଁ କୋର୍ଟ ଦିନ ଧାର୍ଯ୍ୟ କରିଛନ୍ତି ।

ଇଟିଭି ଭାରତ, କଟକ