ଖୋର୍ଦ୍ଧା :ଖବରକାଗଜ ସଂଗ୍ରହର ନିଶା ଦେଇଛି ନିଆରା ପରିଚୟ । ନିଜ ଘରକୁ ଖବର କାଗଜର ସଂଗ୍ରହାଳୟ କରିଛନ୍ତି ଖୋର୍ଦ୍ଧା ବାସିନ୍ଦା ବିମଳ ଚନ୍ଦ୍ର ଷଡ଼ଙ୍ଗୀ । ଓଡ଼ିଆ, ହିନ୍ଦୀ, ଇଂରାଜୀ, ତାମିଲ , ମାଲାୟାଲମ ସହ ଋଷିଆ, ଇଂଲଣ୍ଡ, କାନାଡ଼ା , ଜର୍ମାନ , ଆଫ୍ରିକା ଭଳି ଅନେକ ଦେଶୀ ଓ ବିଦେଶୀ ଭାଷାର ଖବରକାଗଜକୁ ସଂଗ୍ରହ କରି ରଖିଛନ୍ତି ସେ । ପଞ୍ଚାୟତଠାରୁ ଆରମ୍ଭ କରି ୱାଶିଂଟନ ପର୍ଯ୍ୟନ୍ତ ବାହାରୁଥିବା ଦୈନିକ, ସାପ୍ତାହିକ, ତ୍ରୈମାସିକ ଓ ବାର୍ଷିକ ମୁଦ୍ରିତ ଖବର କାଗଜକୁ ସଂଗ୍ରହ କରିବା ପାଇଁ ଲାଗି ପଡିଛନ୍ତି । ଖୋର୍ଦ୍ଧା ସହରର ବରିଷ୍ଠ ନାଗରିକ ସଂଘର ସମ୍ପାଦକ ବିମଳ ଚନ୍ଦ୍ର ଷଡ଼ଙ୍ଗୀ ନିଜ ପତ୍ନୀଙ୍କ ସ୍ମୃତିରେ କରିଥିବା ଏହି ସଂଗ୍ରହାଳୟରେ ୧୦୬ଟି ଦେଶର ୬ ହଜାର ୧୫୮ଖଣ୍ଡ ମୁଦ୍ରିତ ଖବରକାଗଜ ସଂଗ୍ରହ କରି ରଖିଛନ୍ତି । ଯାହା ତାଙ୍କୁ ଦେଇଛି ନୂଆ ପରିଚୟ ।
ଏଥିରେ ଆସାମ ରାଜ୍ୟର ସର୍ବାଧିକ ୪ ଟି ଭାଷା ସହ ଆଞ୍ଚଳିକ ଓ ବିଦେଶୀ ଭାଷାକୁ ମିଶାଇ ମୋଟ ୧୦୮ଟି ଭାଷାର ଖବର କାଗଜକୁ ସଂଗ୍ରହ କରିଛନ୍ତି । ପ୍ରଥମେ ସେ ଆଞ୍ଚଳିକ କାଗଜ ଯୋଗାଡ଼ କରିଥିଲେ । ୨୦୧୭ ମସିହା ସୁଦ୍ଧା ୧ ହଜାର ୪୧୦ ପ୍ରକାରର କାଗଜ ଯୋଗାଡ଼ କରି ନିଜ ପତ୍ନୀଙ୍କ ନାମରେ କରୁଣାମୟୀ ସ୍ମାରକୀ ସମ୍ବାଦପତ୍ର ସଂଗ୍ରହାଳୟ ଉନ୍ମୋଚନ କରିଥିଲେ । ୭ ବର୍ଷ ମଧ୍ୟରେ ଏହି ଖବର କାଗଜ ସଂଖ୍ୟା ପ୍ରାୟ ୪ ଗୁଣ ବଢ଼ିଛି । ସମବାୟ ବିଭାଗରୁ ୨୦୧୩ ମସିହାରେ ସହକାରୀ ନିବନ୍ଧକ ଭାବେ ଅବସର ଗ୍ରହଣ କରିବା ପରେ ବିଭିନ୍ନ ସ୍ଥାନରୁ ପ୍ରକାଶ ପାଉଥିବା ଖବରକାଗଜ ସଂଗ୍ରହ କରିବା ନିଶା ତାଙ୍କୁ ଘାରିଥିଲା । ଆମେରିକା , ଜର୍ମାନ୍ , ଆଫ୍ରିକା , ଚୀନ ,ପାକିସ୍ତାନ , ଦୁବାଇ , ଇଂଲଣ୍ଡ , ଭୁଟାନ , କେନିଆ, ଆରବ , ଓମାନ , ମ୍ୟାଲେସିଆ , ନାଇଜେରିଆ , ଫ୍ରାନ୍ସ , ସ୍ପେନ ଆଦି ପ୍ରାୟ ୧୦୬ଟି ଦେଶର କାଗଜ ସେ ଯୋଗାଡ଼ କରିସାରିଲେଣି ।